سیزدہ نومبر بلوچ شھیدانی سالروچ ءِ درگت ءَ برجم داشتگیں مراگشے ءَ بلوچ نیشنل موومنٹ ( بی این ایم ) ءِ بنجاھی پتر ءِ باسک ماہ گنج بلوچ ءَ بھر زرتگ ءُ اے دیوان ءَ بلوچ شھیدان ءَ ستک شانی ندر کرتگ آئی تران کرتگ ءُ گوشتگ کہ اے روچ چہ شھید مھراب ھان ءِ شھیدی ءِ پژدر ءَ زورگ بیتگ کہ آئی انگریز زورگر ءِ بگیری ءَ جنگ دیان ءَ وتی جان ندر کرتگ۔ آئی ءَ زانتگ کہ انگریز ءِ کر ءَ سلاہ ءُ سامان ھست بلے نواب مھراب ھان ءَ گوں وتی کسانیں لشکر ءُ گوں کمیں سلاھاں جنگ کرتگ۔ نواب مھراب ھان ءِ شھیدی ءَ مارا ھمے سکین داتگ کہ بلوچ مرت کنت بلے دژمن ءِ دیم ءَ لگور نہ بیت۔ اے ھما درچ اِنت کہ ھزارانی کچ ءَ بلوچ ءِ بچ ءُ جنکاں پہ بلوچ ءِ وشیں باندات ءُ بلوچ سرڈگار ءِ رکینگ ءَ وتی جان ندر کرتگ اَنت۔ ھمے درچ ءَ نواب اکبر ھان بگٹی ھم وتی پیری ءِ امر ءَ کوھاں روت ءُ وتی جان ءَ ندر کنت۔
آئی ءَ گوشتگ کہ ما وھد ءِ کرداں چار ایں بچک ءُ جنک ھوار گھگیری کنگ ءَ گندگ بنت گڑا مئے بلوچ جھد ءِ پڑا بلوچ ءِ بچک ءُ جنکاں ھواری ءَ جھد دیم ءَ برگ لوٹ ایت۔ مارا مئے بلوچ شھیدانی دیمونی ءَ ھم ھمے چیز پیش داشتگ کہ اے جنگ ءَ بلوچ ءِ بچک ءُ جنکاں دوئیناں یک کساس ءَ ھوار بوگ لوٹ ایت۔
ماہ گنج بلوچ ءَ تران کنان ءَ گوشتگ ما وھدے ریاست ءَ چاریں آ ھم بلوچ ءِ بچاں ھوار جنکاں ھم زوراکیانی آماچ کنگ ءَ اِنت۔ انوں پنجگور ءِ ویل بہ بیت کہ اود ءَ نازیہ شپی گوں مات ءَ ھوار آوار جنگ بیت آئی ءِ گون ءَ بدکاری ھم کنگ بیت، آئی جند نمیران بیت بلےآئی مات ھم ٹپی بیت ءُ نادراھجاہ ءَ برگ بیت۔ ریاست اے چیز ءَ ھچ نہ چار ایت کہ اے مردے، جنینے یا کسانیں زھگے، کسان سالیں بھتی ھم چہ ھمے دژمن ءِ ٹوپ ءُ بمباں شھید بیت۔ مشکے ءَ سمینہ بلوچ گوں وتی چار براتاں شھید بیت۔ چہ جاؤ ءَ 1970 ءَ سومری ءُ پیراڑی برگ بنت داں مرچی آیانی ھچ ھال نیست کہ آ مرتگ اَنت یا زندگ اَنت۔ زرینہ مرزی ءُ ھنیپہ بگٹی ھم پما مسال اَنت۔
آئی ءَ گوشتگ کہ مرچی باید اِنت چہ بلوچ ءِ ھمک گس ءَ کس پشت مہ کپ ایت ءُ درس جھد ءِ بھر بہ بنت۔ مرچی بلوچ ءِ ماس ءُ پس ھم وتی زھگاں وت دیم بدے اَنت کہ شما برو اِت ءُ جھد ءِ بھر بہ اِت چی ءَ کہ پہ بلوچ ءَ ھچ پشت نہ کپتگ۔
ماہ گنج بلوچ ءَ گوشتگ کہ ریاست پوج ءُ آئی چیریں ادارہ شپانی بے وھد ءَ بلوچانی گساں بیڑ بر اَنت ءُ بلوچ ءِ چادر ءُ چار دیوالی لگتمال بوگ ءَ اَنت۔ اے جیڑہ بلوچ ءِ ننگ، پجار ءُ پدریچ ءِ جیڑہ اِنت گڑا مارا درساں اے آجوئی ءِ جنگ ءِ بھر بوگی اِنت۔
