بلوچ نیشنل موومنٹ (بی این ایم ) ءِ نیمگ ءَ شھیدانی روچ ءِ درگت ءَ نیدرلینڈءَ مراگشے برجم داشتگ۔ مراگش ءَ بی این ایم ءُ پی ٹی ایم ءِ کارکناں بھر زرتگءُ آیاں وتی ھیال درشان کرتگ ءُگوشتگ کہ مرچی بلوچ ورنایانی سر ءَ پرز اِنت کہ آ وتی شھیدانی کاروان ءَ سرپد بہ بنت، ایش ءَ دیم ءَ بہ براَنتءُ وتی راج دوستی ءَ ھمک تک ءَ پیش بہ دار اَنت۔
مراگش ءَ بی این ایم ءِ نیدرلینڈءِ چیپٹر ءِ سدر مھیم ابدلرھیم ، نائب سدر وھید بلوچ، ڈاکٹر وھید بلوچ، ابدلواھد بلوچ، جمال بلوچ، مھمدمھیم، باسد زھیر، اسا بجار، سلار بلوچ، سیپ ابید، سلیمہ آبد جان کادر، ابدلرھمانءُ پی ٹی ایم یورپ ءِ کواڈینیٹر ملک بازئی ءَ تران کرتگ ءُگوشتگ کہ بلوچ شھیداں اے جاوراں وتی جان کربان کرتگ اَنت آکربانی تھنا یک وھدے ءِ نہ اَنت بلکیں یک مھکیں راجی زانتءِ نشانی اَنت۔
آیاں گوشتگ کہ شھیداں ھمے پیش داشتگ کہ زور، زوراکی چونیں ھم راجے ءِ توکل ءَ پروش دات نہ کنت۔ بلوچستان ءِ سرڈگار چہ اے نامداریں پرزندانی ھوناں سھر اِنت آیاں وتی پدریچ ءِ آجوئی ، انساپ ءُ واھگ زندگ داشتگ۔
آیاں گوشتگ کہ 13 نومبر ءِ روچ تھنا یاتے نہ اِنت بلکیں یک پگر، یک توکلے ءِ چیدگ اِنت۔ اے روچ مارا یات دنت کہ پہ آجوئی ءِ واھگ ءِ زندگ دارگ ءَ کربانی دیگ المی اِنت ءُ بلوچ شھیداں وتی جانانی کربانی داتگ ءُ اے واب ءِ راست کنگ ءِ چیدگ ایر کرتگ۔
آیاں گوشتگ کہ 13 نومبر 1839 ءَ برتانوی پوجءَ بلوچ سرڈگار ءِ دستیگ کنگ ءَ اُرش کرتگ۔ بلوچ پرزندان وتی سرزمین ءِ رکینگ ءَ زورگریں انگریز پوج ءِ دیم پہ دیمی کرتگ ءُ وتی سردگار ءِ رکینگ ءَ ھان بلوچ مھراب ھان ءُ آئی سنگتاں گوں دلیری ءَ جنگ داتگ ءُ نمیران بوتگ اَنت۔آ جانی دروشم ءَ چہ ما گستا بوتگ اَنت بلے آیانی پگر زندگ اِنت۔
تران کنوکاں گوشتگ کہ ھان میر مھراب ھان ءِ کربانی نہ تھنا یک دمانےگوستانک نہ کرتگ بلکیں گھگیری ءِ ھما پلسپہ پیش داشتگ کہ پد ءَ پہ سروکءُ مھلوک ءَ گھگیری ءَ مادنیں کشکے جوڑ بوتگ۔ھمے درچ ءَ ھزاراں بلوچ جنین، کماش، زھگ ءُ ورنایاں وتی سرانی کربان کنگ ءِ راہ پیش داشتگ۔ مرچی چہ شھراں گیشتر بلوچستان ءِ کبرستان آباد اَنت بلے بلوچ راج ءَ گھگیری برجاہ داشتگ ءُ زورگریں پاکستان ءِدیم ءَ اوشتوک اَنت۔ توتک، دشت ءُ نیوکاھانءِ کبرستان اے گپ ءِ منانک اَنت کہ ما پہ زمین ءَ وتی سرانی کربان کنگ ءَ چک ءُ پد نہ بہ ایں
پی ٹی ایم ءِ پورپ ءِ کوارڈینیٹر ملک بازئی ءَ گوشتگ کہ بد بھتی ءَ بلوچ، پشتون راج ءِ سر ءَ یک انچیں ریاستے زورگر اِنت کہ آ سرجم ءَ جنگی راھبنداں زبھر اِنت۔ ما ستک شانی ندر کن ایں بلوچ شھیداں کہ آیاں وتی جانانی دیمونی داتگ ءُ بلوچستان ءِ آجوئی جھد مھکم کرتگ۔ جھان ءِ تہ ءَ آ راج مرچی ھم زندگ اَنت کہ آیاں وتی شھید ھچبر بیھال نہ کرتگ اَنت۔بلوچ ءُ پشتون ءِ یک گوستانکی سیادی یے ھست کہ ما زی ھم بلو چ ءِ گون ءَ اوشتاتگ ایں ءُ مرچی ھم ھمک بھرگ ءَ بلوچ راج ءِ گون ءَاوشت ایں ۔ مئے دژمن ھم یکین اِنت ءُ مئےمنزل ھم یکین اِنت۔
اے مراگش ءِ ڈبہ ماھرہ بلوچ ءُ دیدگ بلوچ ءَ گوں بوتگ۔
