بلوچ یکجھتی کمیٹی ءَ وتی شنگ کرتگیں درشانے ءَ گوشتگ کہ سروکانی بگیری ءَ برجاھیں کیس ءَ یکبرے پد ءَ ھمے پیش داشتگ کہ ریاست نہ تھنا پہ بگیریانی دارگ ءَ کانود ءَ چو سلاہ ءَ کارمرز کنگ ءَ اِنت بلکیں آمیدگس ءَ ھم مان آرگ ءَ نہ اَنت۔
آئیءَ گوشتگ کہ گوستگیں روچ ءَ زندان ءَ بیتگیں جست ءُ پرس ءِ میان ءَ یکبرے پد ءَ سی ٹی ڈی سرجمیں چالان ءِ آمیدگس ءَ پیش کنگ ءَ بے سوب بیتگ۔ کیس ءَ پہ زانت پندلانی رد ءَ دراجکش کنگ ءَ اَنت۔
درشان ءَ گوشگ بیتگ کہ بنداتی وھد ءَ ھم سی ٹی ڈی ءَ بی وائی سی ءِ سروکانی بگیریءَ دروگیں ایپ آئی آر ءِ درچ جاڑیگ کرتگ اَت۔ ریمانڈ ءِ جست ءُ پرسانی میان ءَ ھم جج ءَ گوشتگ اَت کہ درسیں کیس یکجاہ ءَ پیش کنگ بہ بنت۔ بلے چہ ایشی ءَ پد سی ٹی ڈی ءَ 25 ءَ گیش دروگیں کیس آرتگ اَت۔ داں انوں برجاھیں جست ءُ پرسانی میانءَ سی ٹی ڈی ءَ چُشیں نوکیں چالانے پیش نہ کرتگ آ ساری ءَ پیش نہ بیتگ۔ اے جاوراں نہ ایوک ءَ ریاستی ادارھانی نیمگءَ کانودی نزام چو سلاہ ءِ پیم ءَ کارمرز بوگ ءَ اِنت بلکیں آمیدگس ءِ واک ھم شریں وڑے ءَ سانمند بوگ ءَ اِنت۔
آئی ءَ گڈی ءَ گوشتگ کہ بی وائی سی گوں انسانی ھکانی گل، وکیل ءُ سول سوسائٹی ءَ لوٹ کنت کہ آ پہ کانود ءِ رد کارمرز کنگ ءُ انسانی ھکانی کارکنانی بگیری ءَ ریاستی زوراکیانی سر ءَ دلگوش بدے اَنت ءُ پہ بی وائی سی ءِ سروکانی یل کناھینگ ءَ وتی کرد ءَ پیلو بہ کن اَنت۔
