ھزدار ءَ زور بیگواھیں سلمان بلوچ ءِ کھول ءَ آئی زوریں بیگواھی ءِ بگیری ءَ زھرشانی روانکے کش اتگ۔ روانک ءَ سیاسی ءُ چاگردی کارکن، جنین ءُ زھگ، زور بیگواھیں مردمانی کھول ءُ لس مردماں بازیں کچے ءَ بھر زرتگ۔
زھرشانی کنوکیں مردماں بینر، پلے کارڈ ءُ اکس دستاں بیتگ اَنت کہ آیاں زوریں بیگواھیانی بگیری ءَ اوگام جتگ ءُ سلمان بلوچ ءَ ھوار درسیں بیگواھیں مردمانی آجوئی ءَ لوٹ کرتگ۔
آئی گھار سادیہ بلوچ ءِ گوشگ اِنت کہ سلمان بلوچ ھزدار ءِ جاہ منند اِنت 13 نومبر 2022 ءَ پاکستانی پوج ءَ چہ شال ءَ آوار جتگ کہ انگت ءَ آئی ھچ وڑیں ھال نیست۔ آ نہ آمیدگس ءَ پیش کنگ بیتگ ءُ نہ آئی بابت ءَ مارا پہ زور بیگواھیں مردماں جوڑ بیتگیں کمیشن ءَ سرپدی داتگ کہ آ کج ءَ اِنت۔
آئی ءَ گوشتگ کہ چو منی برات سلمان ءِ وڑ ءَ دگہ ھزارانی کچ ءَ ورنا درکانودی آوار جنگ ءُ بیگواہ کنگ بیتگ اَنت کہ آیانی کھول نہ تھنا انساپ ءِ چمدار اَنت بلکیں پہ انسانی ھکاں توار چست کنگ ءَ اَنت۔
زھرشانی کنوکیں مردمانی گوشگ اِنت کہ زوریں بیگواھی نہ تھنا یک مردمے ءِ ھکانی بگیری اِنت بلکیں سرجمیں چاگرد ءَ جنجال کنت اے جیڑہ زوت ھلاس کنگ بہ بیت۔
