شال ءَ بی ایس او پجار ءُ بی ایس او ءِ نیمگ ءَ پاکستانی پوج ءِ دست ءَ کشگ بیتگیں بی ایس او پجار ءِ پیشیگیں چیئرمین ءُ بی این ایم ءِ باسک شھید چیئرمین زبیر بلوچ ءُ شھید نسار بلوچ ءِ نیمرانی ءِ چل ءِ درگت ءَ یک دیوانے برجم دارگ بیتگ۔
اے دیوان ءِ جارچینی ءِ زمہ واری اکرام بلوچ ءَ گوں بیتگ کہ دیوان چہ شھیدانی یات ءَ دو دمان ءِ بے تواری ءَ پد بندات بیتگ۔
دیوان ءَ بی ایس او پجار ءُ بی ایس او ءِ بنجاھی سروک ءُ باسکاں شھیدان ءَ ستک شانی ندر کرتگ ءُ آیانی زند ءُ کرد ءِ سر ءَ وتی ھیال درشان کرتگ اَنت۔
آیاں گوشتگ کہ شھید چیئرمین زبیر بلوچ مدام راھبندانی پاسداری کرتگ ءُ پر ایمنیں جھدکارے بیتگ ءُ لس بلوچ ءُ نودبرانی رھشونی کرتگ۔ آئی وتی سرجمیں زند پہ بلوچانی بنیادی ھک ءُ انساپ ءِ جھد ءَ ببا داتگ۔
آیاں گوشتگ کہ شھید زبیر بلوچ ءَ درکانودی کوش، زوریں بیگواھی ءُ ریاستی زوراکیانی بگیری ءَ گوں نہ ترسی ءَ توار چست کرتگ۔ آئی پہ بلوچ نودربرانی سیاسی زانشت ءِ مھکم کنگ ءُ گھگیری ءَ جوانیں کردے پیلو کرتگ۔
آیاں گوشتگ کہ چیئرمین زبیر بلوچ یک شوربندی یے ءِ پارست ءَ نشانگ کنگ بیتگ دانکہ بلوچ ءِ پہ ھکاں چست بیتگیں جھد دارگ بہ بیت۔ شھید زبیر بلوچ ءِ جھد ءُ دیمونی پہ بلوچ راج ءَ یک مادنیں کشکے اَنت ءُ زوراکیانی بگیری ءَ گھگیری ءَ زندگ دار اَنت۔
آیاں گوشتگ کہ شھید نسار جان پہ راج دوستی، اتھاد ءُ انساپ ءَ جھد کنگ ءَ بیتگ کہ آئی ءَ وتی زندگی پہ بلوچ راج ءَ ندر کرتگ۔ آئی جھد ءُ دیمونی بلوچ نودربر سیاست ءِ پڑا پہ مدامی گیر آرگ بنت۔
