بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَماں چاگردی رسانکدر ایکس ءَ وتی شنگ کرتگیں درشانے ءَ گوشتگ کہ گوستگیں لھتیں روچ بیت پاکستان ءَ یکبرے پد ءَ میان استمانی تک ءِ رد دیگ ءِ جھد کرتگ۔ یک انچیں ٹولی یے یورپ ءَ دیم داتگ کہ آ وت ءَ بلوچ ءِ جھگیر پدر کنگ ءَ اَنت۔ بلے اے مردم بلوچ مھلوک ءِ گچین کرتگیں نہ اَنت بلکیں پاکستان ریاست ءُ پوج ءِ چیردست اَنت۔ اے بلوچ ءِ واھشت، دیمونی ءُ رنجانی جھگیر نہ اَنت۔
آئی ءَ گوشتگ کہ اے ٹولی ءَ لھتیں پارلیمنٹ ءِ باسک ھم ھوار اِنت کہ آ تچک ءَ بلوچستان ءَ برجاھیں بلوچ چکچینی ءَ جائز لیکگ ءُھمیشی پلہ مرزی ءَ کنگ ءَ اَنت۔
ڈاکٹر نسیم بلوچ ءَ گوشتگ کہ ایشانی اد ءَ ساڑی بوگ ءِ مول بس یکے اِنت کہ آ راستیاں چیر بدے اَنت، دروگیں پندل سازی بہ کن اَنتءُ پاکستان ریاست ءِ میارباریاں جھان ءِ دیم ءَ چیر بدے اَنت۔
آئی ءَ گوشتگ کہ ھزارانی کچ ءَ بلوچ مرد، جنین ءُ زھگ آوار جنگ، آزار دیگ ءُ کشگ بوگ ءَ اَنت ءُ آھمے چکچینی ءِ زمہ وار اَنت گڑا اے جھگیر ھما زوراکانی کمکار اَنت ءُ ھمایانی گپ ءَ کن اَنت۔ اے برجاھیں زورگپتی ءِ میار ءَ شریدار اَنت۔
ڈاکٹر نسیم بلوچ ءَ گوشتگ کہ بلوچ ءِ ھکی ئیں جھگیر ھما اَنت کہ آ پاکستان ءِ نوک آبادکاری ءِ بگیری ءَ گوں نہ ترسی ءَ گھگیری کنگ ءَ اَنت۔ آ بندیگی، زوریں بیگواھی ءُ چہ ترس ءَ ابید پہ انساپ ءُ آجوئی ءَ توار چست کنگ ءَ اَنت۔
آئی ءَ گوشتگ کہ ما گوں یورپی سرکار، ادارہ ءُ انسانی ھکانی گلانی گون ءَ لوٹ کن ایں کہ آ پاکستانءِ جوڑ کرتگیں چہ وتگڑیں ٹولیءِ گپاں رد مہ کپ اَنت۔ بلوچ ءِ جیڑہ دیمروئی یا ھواری ءِ نہ اِنت بلکیں آجوئی، انساپ ءُ راجی وتواکی ءِ جیڑہ اِنت۔
