بلوچ اسٹوڈنٹس ایکشن کمیٹی ءِ جارکش ءَ وتی شنگ کرتگیں دشانے ءَ گوشتگ کہ بلوچ اسٹوڈنٹس ایکشن کمیٹی ءِ چارمی بنجاھی لس مجلس ءِ سوگندی دیوان “یا اتاشاد ءُ آزات جمالدینی ءِ یاتءُ دلیریں بلوچ زالبولیں جھدکارانی نام ءَ” کیچ ءَ سوبمندی ءَ گوں برجم دارگ بوتگ۔ دیوان ءِ تہ ءَ جتائیں بن گپ ھوار بوتگ اَنت کہ آوانی تہ ءَ گُشتانک، کتاب دیمدرائی، ڈاکومینٹری، کتاب میڑہ ءُ ساز ءُ زیملی دیوان ھوار بوتگ اَنت۔ دیوان ءَ گل ءِ انوگیں کماش ءَ ھوار گوستگیں بنجاھی کماش، گوستگیں مزن کارگشاد ءُ ایدگہ مھمان واجہ گنی پرواز، ھسا زپر،گلزار دوست، ڈاکٹر شلی بلوچ ءُ سنگت الی جان مکسود ءَ ھوار بلوچ نودربر ءُ مھلوک ءَ مزنیں کچے ءَ بھر زُرتگ ءُ ساڑی بوتگ۔
آئی ءَ گوشتگ دیوان ءِ بندات گوں بلوچ راجی سوت ءَ کنگ بوتگ۔ چہ آئی ءَ پد گوستگیں کماش شبیر بلوچ ءَ نوک گچین بوتگیں بنجائی کماش اُزیر بلوچ، کمک کماش الی بلوچ، بنجاھی مزن کارگشاد پیرجان بلوچ، کمک کارگشاد تنویر بلوچ ءُ بنجاھی رسانکدری کارگشا پھد بلوچ ءَ ھوار کلیں بنجاھی کمیٹی ءِ سنگت سوگند داتگ اَنت۔ دیمتری بنگپ گُشتانک بوتگ کہ اولی تران گوستگیں بنجاھی کماش شبیر بلوچ ءِ بوتگ، آئی ءَ تران کنان ءَ گوشتگ کہ بنجاھی لس مجلس تھنا لیڈرشپ ءِ مٹ بوگ ءِ نام نہ اِنت بلکیں بلوچ سیاست ءِ تہ ءَ نوکیت ءُ نوکیں پروگرامانی دیم ءَ آرگ ءَ ھوار یک مھکمیں سیاسی کیڈرسازی ءِ بستار ءَ آؤکیں یک توانگر ءُ لائکیں نسلے ءِ پیداگ کنگ ءَ پیسلہ سازی ءِ نام اِنت۔
آئی ءَ گوشتگ کہ دومی تران واجہ گنی پرواز ءِ بوتگ کہ آئی ءَ واجہ اتاشاد ءُ آزات جمالدینی ءِ سر ءَ تران کرتگ ءُ وتی دانک ایر کرتگ اَنت، دیمتر ءَ واجہ ھسا زپر ءَ بلوچ سیاست ءُ بلوچ نودربر سیاست ءِ نزوری ءُ مھکمی ءِ سر ءَ وتی ھیال درشان کرتگ اَنت ءُ آوکیں لیڈرشپ ءَ مھکمیں ءُ دورچاریں سیاست کنگ ءِ سکین داتگ۔ چہ آئی ءَ پد بلوچ وومن پورم ءِ آرگنائیزر ڈاکٹر شلی بلوچ ءَ وتی تران ایر کرتگ ءُ دلیریں بلوچ زالبولانی سر ءَ وتی گپ ءُ ھیال درشان کرتگ اَنت ءُ گوشتگ کہ اے دور ءَ بساک ءِ بلوچ زالبولیں جھدکارانی نام ءَ وتی بنجاھی لس مجلس ءِ ایر کنگ بلوچ زالبولانی یکشلیں جھد ءِ ستا کنگ ءَ ھوار آیانی کِرد ءَ سیاسی تک ءَ ھوار کنگ ءُ ھوری ءَ جُنزگ ءِ چیدگ اِنت۔
آئی ءَ گوشتگ کہ گڈی تران انوگیں بنجاھی کماش اُزیر بلوچ ءِ بوتگ کہ آئی ءَ وتی ھیال ایر کرتگ اَنت ءُ گوشتگ کہ مرچیگیں اے دیوان ءِ سوبمندی مئے سنگتانی یکشلیں جھد ءِ برورد اِنت کہ ما مرچی وتی سوگندی دیوان ءَ بلوچستان ءِ جتائیں ھنداں آتکگ ایں سنگتانی ماں کیچ ءِ دلبند ءَ ساڑی بوگ ءَ گوں کنگ ءَ ایں۔ کیچ ءِ دمگ ءَ پِدا ءِ کِشتگیں توم اِنت کہ مرچی آ رُستگ ءُ شاہ جتگ ءُ برئِے اے دیوان ءِ نشتگیں لائکیں سیاسی جھدکار اَنت۔ بگندئے بازیں مردمے ھمے گش ایت کہ بلوچ تپاک نہ اِنت بلے من سرپد باں کہ اے ردیں ھیالے چیاکہ بلوچستان ءِ انتزامی ھوالہ ءَ جتائیں ھند ءُ دمگاں چہ سنگتانی آیگ ءُ کیچ ءِ دلبند ءَ ساڑی بوگ مستریں تپاکی ءِ چیدگ اِنت۔ ما کہ سوگند وارتگ ءُ ادارہ ءُ راج ءَ گوں ایماندار ءُ بلوچ ورنایانی زانشتی ھوالہ ءَ پِگری رھشونی کنگ ءِ پیمان کُتگ گڑا اے داں گُڈی مکسد ءَ سر بیگ ءَ روان بیت۔
آئی ءَ گوشتگ کہ دیمتری بنگپ دو ڈاکومینٹری بوتگ اَنت کہ یکے بلوچ لبزانک ءِ نامداریں شائر واجہ اتاء شاد ءِ زند ءُ ازم ءِ سر ءَ بوتگ ءُ دومی ڈاکومینٹری بلوچی شائر واجہ ابدالواھد آزات جمالدینی ءِ سرءَ بوتگ۔ ھمے پیم ءَ سئے کتاب کہ آئی تہ ءَ گل ءِ نیمگ ءَ چہ چاپ بوتگیں تاک “گام” گل ءِ تاک “نوشت” ءُ گل ءِ سنگت جاپر کمبرانی ءِ براھوئی بولی ءِ تہ ءَ کتاب “بلوچستان نا مڈیک” ءِ دیمدرائی بوتگ ءُ گڈ سرءَ کتابی سوگات ءِ یک بھرے ھم ھوار بوتگ۔ چہ کُلیں بنگپاں پد گڈی بنگپ ساز ءُ زیملی بھر بوتگ کہ جتائیں گشندھاں گوں وتی توار ءَ دیوان زیبدار کرتگ ءُ دیوان آسر کنگ بوتگ۔
