بلوچ راجدوستیں سروک رھیم بلوچ ایڈوکیٹ ءَ وتی شنگ کرتگیں درشانے ءَ گوشتگ کہ بلوچ جنین نازیہ شپی ءُ آئی مات پری بلوچ ءِ چہ پنجگور ءَ گس ءَ پاکستانی پوج ءِ دست ءَ آوارجنگ ءَ گوں ترندیں دانکاں ایر جن آن ءُ اے ناشریں زوراکی ءِ جست گرگ ءُ انساپ ءِ لوٹ ءَ کن آں۔
آئی ءَ گوشتگ کہ درکانودی آوار جنگ ءِ میان ءَ چہ سسائی ءُ جانی آزار، بدکاری ءِ سوب ءَ نازیہ شپی بیران بیتگ اے جنگی میارباری یے۔ زورگریں پاکستانی پوج ءِ نیمگءَ بلوچ جنینانی بگیری ءَ اے ناشریں کارپد چونیں ھم مردم یا کھولے ءِ جیڑہ نہ اِنت بلکیں بلوچ ءِ ننگ ءُ شرپ ءِ سر ءَ ارش اِنت۔
رھیم بلوچ ایڈوکیٹ ءَ گوشتگ کہ پاکستانی پوج گوستگیں سے دھک اِنت کہ زورگپتیں بلوچستان ءَ اے پیمیں جنگی میارباری کنگ ءُ انسانی ھکاں لگتمال کنگ ءَ اِنت، بلے داں مرچی آ نہ پاکستان ءِ آمیدگس ءُ نہ میان استمانی ادارھاں اے میارباریانی سر ءَ جست کرتگ اَنت۔
آئی ءَ گوشتگ کہ اکوام متھدہ ءُ میان استمانی تک ءِ سر ءَ ھژدری اِنت کہ آ پاکستانی پوج، سی ٹی ڈی ءُ چیریں ادارھاں بلوچستا ن ءَ انسانیت ءِ بگیری ءَ میارباری، جنگی میارباری ءُ انسانی ھکانی لگتمالیانی سر ءَ جست بہ کن اَنت۔
رھیم بلوچ ءَ گوشتگ کہ تھنا ایر جنگ بس نہ اِنت، میاربار جست کنگ ءُ گوں سانمندیں کھولاں انساپ کنگ بہ بیت۔
بلوچ راجدوستیں سروک ءَ گوشتگ کہ بلوچ مھلوک ءِ کمشرپیءُ چہ ایردستی ءَ کشگ ءَ تچکیں راہ بلوچستان ءِ آجوئی اِنت۔
