بلوچ نیشنل موومنٹ ( بی این ایم ) ءِ شھدا میموریل کونسل ( شھیدانی تاک ) ءَ پہ بلوچ شھیداں یک چیدگے شنگ کرتگ۔ شھیدانی تاک بی این ایمءِ انپارمیشن ءُ کلچر ڈیپارٹمنٹ ءِ چیردستی ءَ کار کنگ ءَ اِنت۔ ایشی بنکی مول بلوچ شھیدانی بابت ءَ سرپدیانی یکجاہ کنگ ءُ آیاں ویب سائیٹ ءُ چہ رسانکدر ءِ رد ءَ داں مھلوک ءَ سر کنگ اِنت۔
اے نوکیں چیدگ ءِ بابت ءَ بی این ایمءِ انپارمیشن ءَ یک سرجمیں نبشتانکے ھم شنگ کرتگ، آئی ءَ پہ اے چیدگ ءِ بابت ءَ گوستانکی، لیکھی، دودمانی ءُ ازمی بابت ءَ گپ جتگ۔
کازی ریھان ءَ رسانکدر ءَ وتی شنگ کرتگیں درشانے ءَ گوشتگ کہ اے چیدگ بلوچ شھیدانی دیریگیں ھال ءِ کردی درشان اِنت، ایشی گوستانکی پژدر، گوں سرڈگار ءَ ھمگرنچی ءُ دودمانی ارزیشت دیم ءَ آرگ بیتگ۔
آئی ءَ گوشتگ کہ بلوچ ءِ میراس چہ پھریز نہ بوگ ءِ سوب ءَ مھلوک ءِ زانشت چہ وتی گوستانک ءَ دور بوان بیتگ ءُ اے چیدگ ءِ گچین کنگ ءِ مول ھمے سسا ءِ ھالیگی ءِ پر کنگ اِنت ءُ دودمانی گھگیری ءِ کمک کنگ اِنت دانکہ نوکیں پدریچ چہ وتی گوستانکی چیدگ ءُ میراس ءَ ھمگرنچ بہ بیت۔
