بلوچ یکجھتی کمیٹی ءَ وتی شنگ کرتگیں درشانے ءَ گوشتگ کہ پاکستانی پوج ءَ 28 اکتوبر 2025 ءَ پنجگور ءِ ھند پنچی ءَ نازیہ شپی ءُ آئی مات زور بیگواہ کرتگ اَنت۔
آئی ءَ گوشتگ کہ آوارجنی ءِ میان ءَ دوئیں مات ءُ جنک آزار دیگ بیتگ اَنت۔ نازیہ شپی ءِ گون ءَ بدکاری کرتگ ءُ گوں نیم مرگ ءِ جاوراں پنجگور نادراھجاہ ءَ سر کرتگ، اود ءَ چہ الاج ءَ ابید دومی بیگاہ ءَ آئی ٹپانی درد نہ سگ اتگ ءُ بیران بیتگ۔
گل ءِ رد ءَ نازیہ شپی ءِ مات ءِ چہ پاکستانی پوج ءِ آزاراں جاوراں ناگیگ اَنت ءُ پہ الاج کنگ ءَ کراچی ءَ نادراھجاہ ءَ برگ بیتگ۔ اے وڑیں ویل بلوچستان ءَ بلوچ جنینانی بگیری ءَ ریاستی آزارانی یک ترندے درچے پیش دار ایت۔ گوستگیں ماہ ءَ چہ ھزدار ءِ ھند زھری ءَ سپیہ بی بی نامیں جنینے پاکستانی پوج ءَ بیڑے ءِ میان ءَ آوار جتگ اَت۔ چہ ایشی ءَ پیش 23 سالی ئیں یونیورسٹی ءِ نودربر ماہ جبین بلوچ آوار جنگ بیتگ کہ انگت ءَ بیگواہ اِنت۔
آئی ءَ گوں میان استمانی تک ءَ لوٹ کرتگ کہ نازیہ بلوچ ءُ آئی مات ءِ گون ءَ زوریں بیگواھی، آزار دیگ ءُ بدکاری ءِ بابت ءَ پٹ ءُ پول بہ کناھین اَنت ءُ نازیہ شپی ءِ کوش ءَ انساپ بہ دے اَنت۔
آئی ءَ گوشتگ کہ گوں ایشی ھواری ءَ پاکستان سرکار ءَ زور بدے اَنت کہ آ بلوچستان ءَ زوریں بیگواھی، آزاردھیانی وڑیں میارباریاں زوت بدار اَنت۔
آئی گڈی ءَ گوشتگ کہ نازیہ شپی، آئی مات ءُ گوں درسیں بلوچ جنیناں انساپ کنگ میان استمانی تک ءِ دودمانی ءُ کانودی زمہ واری اِنت۔
