مند ءَ زور بیگوھیں پھد بلوچ، ھارون بلوچ ءُ ھمود بلوچ ءِ کھول ءَ چہ برجائیں زھرشانی نندانک ءَ پریس کانپرنس کرتگ ءُ گوشتگ کہ مئے زھرشانی ءِ بُنکی لوٹ چہ 23 اکتوبر ءِ شپ ءِ سئے ءَ جند ءِ لوگ ءَ زور بیگواہ کنگ بیتگیں ،پھد ء اُسمان ،ھارون ء مھمد جان ،ھمود ء مھمد جان ءِ پہ سلامتی آجوئی ءَ اِنت۔
آئی ءَ گوشتگ کہ مرچی مئے زھرشانی نندانک ءَ پنچ روچ اِنت کہ برجاہ اِنت،اے میان ءَ ھندی انتزامیہ ءَ ھوار سرکاری ھچ وڑیں واکدارے مئے کرا پہ گپ ءُ تران ءَ نیتکگ بلے ھمک روچ وڑے نا وڑے ءَ میتگ ءِ میر ءُ مُتبر ءُ باپاری مردم اتکگ اَنت، چہ ایشاں باز ءَ مارا دروگیں دلبڈی داتگ کہ شُمئے زھگ یل کنگ بنت راہ ءَ پچ کن اِت ءُ لھتین ءَ مارا تُرسینگ ءِ جُھد کُرتگ۔
آئی ءَ گوشتگ کہ مرچی یکبرے پد ءَ اے پریس کانپرنس ءِ وسیلگ ءَ چہ ما انتزامیہ ءَ ھوار سرکاری ھمک واکدار ءَ گشگ لوٹ ایں اگاں مرچی تاں باند ءَ مئے زھگ یل کنگ مہ بنت گڑا ما وتی زھرشانی ءَ گیش کن ایں ءُ چہ اے جاہ ءَ ابید ڈی بلوچ ءَ مزن دگ ءَ بند کن ایں ءُ تربت ءَ شھید پدا چاراہ ءَ ھم زھرشانی ءَ نند ایں۔ اے گپ ءَ ما سرپدیں کہ زورگریں ریاست ءَ اے وھد ءَ زھرشانی ءُ مُچی ءِ سر ءَ پابندی جتگ بلے ما آئی ءِ ھچ زوراکی ءَ نہ منّ ایں ءُ داں وتی زھگانی آجوئی ءَ وتی گُڈّی زور ءَ جن ایں ءُ ما دلجمیں کہ ما سوبین بین ءُ ریاست ءَ لاچار کن ایں کہ مئے مردماں یل بہ کنت۔ اگاں نہ گڑا ما زانیں کہ چے بہ کن ایں۔ مئے زھگ مئے زندگی اَنت ءُ ما پہ آیانی یل کنگ ءَ ھرچی کن ایں۔ اے میان ءَ ھرچ وڑیں تاوانے بوت زمہ وار ریاست ءُ ھندی واکدار اَنت۔ ما پُر ایمنیں مردمے بلے زورگریں ریاست ءُ آئی ءِ لشکر مارا پہ ایمنی نندگ ءَ نیلگ ءَ اِنت۔
آئی ءَ گوشتگ کہ گڈسر ءَ ما بلوچ راج منت ءَ گریں اے گرانیں ساھت ءَ وڑے نا وڑے مئے ھمراہ اِنت مئے توار جوڑ اِنت ما امیت کن ایں کہ انگت گیشتر مئے ھمراہ داری ءَ کنت ءُ مئے توار جوڑ بیت۔
آئی ءَ گوشتگ ما یکبرے پد ءَ چہ دُرسیں سیاسی ءُ چاگردی گل ءُ زوربیگواھیں مردمانی کھول ءُ بلوچ راج ءَ دزبندی کن ایں کہ گوں ما ھمتوار بہ بنت۔
