مند ءَ پاکستانی پوج ءِ دست ءَ زور بیگواھیں ورنا پھد بلوچ، ھارون بلوچ ءُ ھمود بلوچ ءِ کھول ءِ نیمگ ءَ زھرشانی نندانک ءَشش روچ سرجم بیتگ کہ انگتءَ برجاہ اِنت ۔
آیاں گوشتگ کہ پہ مئے زھرشانی ءِ ھلاس کنگ ءَ مارا بس دروگیں دلبڈی دیگ بوگ ءَ اِنت کہ شما وتی زھرشانی ءَ ھلاس بہ کن اِت شمئے مردم زوت یل کنگ بنت۔ کسے ءَ مارا ھپتگے ئے وھد داتگ ءُ کسے ءَ مارا دو روچ ءِ وھد داتگ کہ شمئے زھگ یل کنگ بنت۔ بلے انگت ءَ ھچ وڑیں گامگیج زورگ نہ بیتگ۔
آیانی گوشگ اِنت کہ مارا گوں کسانیں زھگاں اد ءَ دگانی سر ءَ نندگ ءُ زھرشانی کنگ ءِ شوک نہ اِنت ما لاچار کنگ بیتگ ایں کہ زھرشانی بہ کن ایں۔
آیاں گوشتگ کہ ما گوں بلوچ راج ءَ ھمے لوٹ ءَ کن ایں مارا کمک بہ کن اِت، دانکہ مئے مردم آجو کنگ نہ بیتگ اَنت ما وتی زھرشانی ءَ برجاہ دار ایں۔
