پشتون تھپز موومنٹ ءِ سروک منزور پشتین ءَ پکتونواہ ءِ جتائیں دمگاں پاکستانی پوج ءِ انوگیں زوراکیانی آسر ءَ بازیں کچے ءَ پشتونانی بیرانی ءُ ٹپی بوگ ءِ سر ءَ بژن درشان کرتگ۔
آئی ءَ گوشتگ کہ ھیبر ءَ تیرہ ءُ کرم ءَ ھوار جتائیں ھنداں زوراکی کنگ بوگ ءَ اِنت۔ کرمءِ مردم اے وھد ءَ پشاور ءَ زوراکیانی بگیری ءَ زھرشانی کنگ ءَ اَنت، پد ءَ ھم آیانی توار ءَ گوش دارگ ءَ نہ اِنت۔
منزور پشتین ءَ گو شتگ کہ ریاست ءِ تہ ءَ انچیں اگدہ دار ھست کہ پشتونانی جھیگری ءِ ٹاپار جن اَنت راستی ھمیش اِنت کہ اے زور ءِ چیردست اَنت ءُ پشتونانی چونیں ھم جیڑھے ءَ چہ وتی منشا ءَ گیش ءُ گیوار کرت نہ کن اَنت۔
آئی ءَ گوشتگ کہ یک نیمگے ءَ پشتون ھندانی جاہ مننداں پہ زور چہ وتی گساں لڈینگ ءَ اَنت ءُ دومی نیمگ ءَ تورکم سیمسر بند کرتگ ءُ آیانی سر ءَ زوراکی کنگ ءَ اِنت۔ ھزارانی کچ ءَ مردم بےگس ءَ نشتگ ءُ شپ ءُ روچ جنجالانی دیمپان اَنت۔ ریاستی ادارہ اے انسانی ھکانی لگتمالیانی سر ءَ بے توار اَنت۔
