مند ءَ زور بیگواھیں ورنا پھد بلوچ، ھارون بلوچ ءُ ھمود بلوچ ءِ کھول ءَ چہ زھرشانی نندانک ءَ پریس کانپرنس کرتگ ءُ گوشتگ کہ مرچی مئے زھرشانی نندانک ءِ چارمی روچ اِنت کہ برجاہ اِنت۔ 23 اکتوبر ءِ شپ ءِ سئے ءَ ایپ سی ءُ اِستانی چیریں ادارھاں مئے لوگ ءَ بیڑ برتگ جنین ءُ چُک کم شرپ کتگ اَنت مئے سئے کسان سالیں ورنا پھد ء اسمان ،ھارون ء مھمد جان، ھمود ء مھمد جان آوار جنگ ءَ پد بیگواہ کتگ اَنت کہ انگت ءَ مارا آیانی بابت ءَ ھچ سرپدی دیگ نہ بیتگ کہ مئے چُک کجام میار ءِ پد ءَ بیگواہ کنگ بیتگ اَنت آیانی گناہ چی اِنت۔
آئی ءَ گوشتگ کہ دو روچ پیش ھندی انتزامیہ اتکگ ءُ گوں ما گپ ءُ تران کتگ اے میان ءَ ما وتی زھرشانی ءِ لوٹ انتزامیہ ءِ دیم ءَ ایر کتگ اَنت کہ مئے مردم دانکہ آجو کنگ نہبنت ما وتی زھرشانی ءَ برجاہ داریں ءُ دگ بند بنت۔ اے میان ءَ انتزامیہ ءَ دہ روچ ءِ وھد لوٹ اتگ ءُ گوشتگ کہ شما وتی زھرشانی ءَ ھلاس بہ کن اِت دہ روچ ءِ توک ءَ شمئے مردم یل کنگ بنت بلے ما بیگواھیں ورنایانی کھول ءَ انتزامیہ ءِ گپ نہ من اتگ اَنت ءُ گوشتگ دانکہ مئے مردم یل کنگ نہ بنت مئے زھرشانی برجاہ بیت۔
آئی ءَ گوشتگ کہ یکبرے پد ءَ ما اے پریس کانپرنس ءِ رد ءَ اے گپ ءَ گوں تچکی ءَ گُش ایں دانکہ مئے مردم آجو کنگ نہ بنت مئے زھرشانی نندانک برجاہ بیت ءُ دگ سرجم ءَ بند بیت۔
آئی ءَ گوشتگ کہ گڈسر ءَ ما چہ بیگواھیں ورنایانی کھولانی نیمگ ءَ مند ءِ سرجمیں بازار ءِ بند کنگ ءِ جار ءَ جن ایں ءُ امیت اِنت کہ بلوچ مھلوک مئے اے جار ءِ پلہ مرزی ءَ کنت ءُ وتی دکاناں یکروچے بند کن اَنت ءُ مئے توار جوڑ بنت، گوں سرجمیں بلوچ راج ءُ بلوچ سیاسی پارٹیاں دزبندی کن ایں کہ مئے توار جوڑ بہ بنت دانکہ مئے چک پہ وش ءُ سلامتی آجو کنگ بہ بنت۔
