شال: بلوچ روانک ءِ سروک ڈاکٹر ماہ رنگ ءَ ماں چاگردی رسانکدر ایکس ءَ نبشتگ کہ اے روانک ءِ تہ ءَ گْوازینتگیں روچ منی سرجمیں سیاسی سپر ءِ وشتریں روچ بیتگ اَنت۔
آئی ءَ نبشتگ کہ من وتی سیاسی سپر ءِ وشتریں روچ گوں بلوچستان ءِ شیرزال ءُ بلوچ بچاں گْوازینتگ اَنت۔
ڈاکٹر ماہ رنگ ءَ نبشتگ کہ من دلجماں کہ ما یک روچے وتی سرڈگار ءَ ایمن کن ایں، کہ ھچ کھول سرگردان نہ بیت، ھچ مات ءِ زھگ بیگواہ نہ بیت، ھچ زھگ چورہ کنگ نہ بیت، گھارانی برات بندیگجاھاں بند کنگ نہ بنت، ورنا گوں ایمنی ءَ وتی کھول ءِ گون ءَ زندگی گْوازین اَنت، کَس درانڈیھ نہ بیت، وژھالی ءُ ایمنی بیت۔
داں دو ماہ ءَ بلوچ زھرشانی نندانک پاکستان ءِ بنجاھی شھر اسلام آباد پریس کلب ءِ دیم ءَ نشتگ ءُ زیکیں روچ ءَ دیم پہ بلوچستان ءَ واتر بیتگ۔ دوشی ژوب ءَ پشتون تھپز موؤمنٹ ءِ باسکاں روانک وش اتک کُرتگ مرچی سھب ءَ کچلاک ءَ ھم پشتون تھپز موؤمنٹ ءِ باسکاں وش اتک کرتگ اَنت۔
مرچی یک وھدے روانک شال ءَ سر بیت ءُ مردم شریں وڑے ءَ روانک ءَ وش اتک کن اَنت۔ گْوستگیں روچ ءَ بلوچ یکجھتی کمیٹی ءِ نیمگ ءَ پنتاک بھر ءُ بانگ کنگ بیتگ ءُ تامُربندے ءَ مردم سرپد کنگ بیتگ اَنت کہ پہ روانک ءِ وش اتک کنگ ءَ جاڑی بہ بنت۔
