یونائیٹڈ بلوچ آرمی (یو بی اے) ءِ جارکش مزار بلوچ ءَ وتی شنگ کرتگیں درشانے ءَ گوشتگ کہ 27 اکتوبر ءِ بیگاہ ءِ ادار چار ءُ نیم ءِ نزیک ءَ کچی ءِ ھند باگ ناڑی شھر ءَ مئے سرمچاراں شھر ءِ پترگ ءِ راہ بستگ اَنت ءُ بازیں کچے ءَ شھر ءَ پترتگ ءُ پولیس تانہ، نادرا کارگس، لیویز تانہ، تھسیل کارگس ءُ نیشنل بینک ءِ سر ءَ کاروائی کرتگ۔
آئی گوشتگ کہ پولیس تانہ ءِ انگیر کنگ ءِ میان ءَ اود ءَ ساڑی ئیں کارمندانی پجار ءُ بلوچ بوگ ءِ بنیاد ءَ کڈن کرتگ اَنت بلے آیاں سرمچارانی سر ءَ اُرش کرتگ۔ چہ ایشی آسر ءَ سرمچاراں کاروائی کرتگ ءُ ترندیں میڑے بوتگ۔ میڑ ءَ ایس ایچ او لتپ الی ءَ ھوار سے کارمند مرتگ ءُ سَے ٹپی بوتگ۔ ھمے میان ءَ سرمچاراں لیویز تانہ انگیر کرتگ ءُ اود ءَ یازدہ بندیگ آجو کناھینتگ ءُ لیویز کارمندانی سرکاری سلاہ دستیگ کرتگ اَنت۔ ایشی ءَ ھوار سرمچاراں نیشنل بینک ءُ تھسیلدار کارگس نشانگ کرتگ ءُ مانداشتگ۔
آئی گوشتگ کہ داں باز اداراں شھر وتی دست ءَ کرتگ ءُ وتی نشانگ ءِ سوبمندی ءَ پد سرمچار چہ شھر ءَ در آیگ ءِ تیاری ءَ بوتگ اَنت کہ پاکستانی پوج بازیں کچے آتکگ کہ سرمچارانی ءُ پاکستانی پوج ءِ میان ءَ داں یک ادارے ءَ ٹوھیں میڑے بوتگ۔ اے میڑ ءَ پاکستانی پوج ءِ سے کارمند مرتگ ءُ باز ٹپی بوتگ۔
جارکش ءَ گوشتگ کہ ھمے میڑ ءَ شھید سنگت ساھب ھان بنگلزئی پنام شوکت ءَ داں گڈی ءَ وتی جان ءِ پروا نہ کرتگ ءُ گوں دژمن ءَ جنگ داتگ ءُ وتی آدگہ سنگت پہ سلامتی در کرتگ اَنت ءُ وتی جان ءِ دیمونی داتگ۔ گل شھید ساھب ھان بنگلزئی ءِ بے مٹیں دیمونی، دلیری ءِ سر ءَ آئی ءَ ستک شانی ندر کنت ءُ آئی داتگیں دیمونیاں مدام یات کنت۔
آئی گوشتگ کہ شھید سنگت ساھب ھان بنگلزئی پنام شوکت 2024 ءَ یو بی اے ءَ ھوار بوتگ۔ کمیں وھد ءِ میان ءَ آئی چہ وتی زانت ءُ جوزگ ءَ یک جوانیں کردے پیلو کرتگ۔ آئی شھری چیرجنگی ءِ بنیاد ءَ دژمن ءِ سُر ءُ پرانی سر ءَ چم سک داتگ ءُ یک مھکمیں نیٹورکے جوڑ کرتگ ءُ زمین ءِ رکینگ ءَ جوانیں کرد پیلو کرتگ۔ آئی داں گڈی ساھت ءَ پہ وتی وتن ءِ پھازداری ءَ گوں دلیری ءَ دژمن ءِ گون ءَ دیم پہ دیمی کرتگ ءُ بے مٹیں دیمونی داتگ کہ آئی وت ءَ نمیران کرتگ۔
جارکش ءَ گوشتگ کہ ما پولیس ءُ لیویز ءَ گوں ترندی ءَ کڈن کن ایں کہ آ وتی رویشت ءَ شر بہ کن اَنت ءُ بلوچ ءِ بگیریں کاراں دزکش بہ بنت اگاں نا ں گڑا تچک ءَ نشانگ کنگ بنت ۔
مزار بلوچ ءَ درشان ءِ گڈی ءَ کاروائی ءِ زمہ واری من اِتگ ءُ گوشتگ کہ مئے اے وڑیں کاروائی داں بلوچستان ءِ آجوئی ءَ برجاہ بنت۔
