بلوچ نیشنل موومنٹ ( بی این ایم ) ءَ بلوچستان ءِ ھند زھری ءَ برجاھیں پوج ءِ انگر کنگءُ پاکستان ءِ زوراکیانی بگیری ءَ بوسان ءِ ناپوڈونگ ءَ زھرشانی کرتگ۔ زھرشانی کنوکاں پہ ھندی مردماں انگری ءُ کوریا زبان ءَ پنتاک بھر ءُ بانگ کرتگ ءُ آیان ءَ بلوچستان ءِ انسانی جاورانی بابتءَ سرپدی داتگ۔
زھرشانی کنوکیں مردمانی گوشگ اِنت کہ پنجاپی پوج بلوچ راج ءِ بگیری ءَ جنگی میارباری کنگ ءَ اِنت ءُ اے میان استمانی تک ءَ جست گرگ بہ بیت۔
زھرشانی کنوکیں مردماں بینر گوں بیتگ کہ آیانی سر ءَ زھری ءَ انگیری ھلاس کنگ”پہ بلوچستان ءَ انساپ” ءُ بلوچ راج ءِ چکچینی بند کنگ بہ بیت” چہ ایشی ءَ ابید آیاں زھری ءَ تباہ بیتگیں گس ءُ سانمندیں کھولانی اکس ھم شنگ کرتگ ا َنت۔
زھرشانی کنوکیں مردماں گوشتگ کہ انوگیں آزمانی ارشاں 20 ءَ گیش شھری بیران بیتگ کہ آیانی تہ ءَ دہ زھگ ھم ھوار اِنت ءُ پنجاہ ءَ گیش ورنا بیگواہ کنگ بیتگ اَنت۔
آیاں گوشتگ کہ زھری ءَ وردن، آپ ءُ درمان نیست، نادراھجاہ پوج ءِ بنجل جوڑ کنگ بیتگ اَنت۔ بیست ءُ چار اداراں دگ بند اَنت ءُ شھری چہ تر ءُ گرد کنگ ءَ دارگ بوگ ءَ اَنت
زھرشانی کنوکیں مردماں گوشتگ کہ زھری ءَ ھونریچی ءِ سر ءَ جھان ءَ بے توار بوگ نہ لوٹ ایت۔ ایمنیسٹی انٹرنیشنل ءُ انسانی ھکانی ادارہ زوت دزمانجی بہ کن اَنت۔
