شال : وائس پار بلوچ مسنگ پرسن ( وی بی ایم پی ) ءِ زھرشانی گدان ءَ شال پریس کلب ءِ دیم ءَ 5978 روچ سرجم بوتگ کہ انگت ءَ برجاہ انت۔ آدینگ ءِ روچ ءَ وی بی ایم پی ءِ چیرمین نسراللہ بلوچ گدان ءَ ساڑی بوتگ۔
زوربیگواھیں نور زیب ءِ کھول گدان ءَ اتکگ ءُ زھرشانی یاداشتگ کرتگ ءُ گوشتگ نور زیب ء ابدلستار ءَ سی ٹی ڈی ءِ کارمنداں چہ سورے ءَ مردمانی دیم ءَ آوار جتگ ءُ بیگواہ کرتگ۔
آیاں گوشتگ کہ نہ نور زیب ءِ آوار جنی ءِ سوب مارا گوشگ بوتگ ءُ نہ آئی بابت ءَ سرپدی دیگ بوتگ، چہ ایشی آسر ءَ مئے کھول سسائی جنجالانی دیمپان انت۔
نسراللہ بلوچ ءَ کھول دلجمی داتگ ءُ گوشتگ کہ گل ءِ بستار ءَ نور زیب ءِ کیس ءَ کانود ءِ رد ءَ پہ انساپ ءَ جوڑ کنگ بوتگیں ادارھانی کر ءَ بر این ءُ پہ نور زیب ءَ توار چست کن ایں۔
آئی گوں سرکار ءَ لوٹ کرتگ کہ آ نور زیب ءِ درکانودی آوار جنی ءَ دلگوش گور بہ کنت۔ نور زیب ءِ سر ءَ چونیں بھتامے ھست گڑا آمیدگس ءَ پیش کنگ بہ بیت۔ اگاں بے میار اِنت گڑا پہ آئی آجوئی ءَ دلجمی دیگ بہ بیت کھول چہ اے آزاراں کشگ بہ بیت۔
