شال: وائس پار بلوچ مسنگ پرسن (وی بی ایم پی ) ءِ زھرشانی گدان ءَ شال پریس کلب ءِ دیم ءَ 5977 روچ سرجم بوتگ کہ انگت برجاہ اِنت۔ گل ءِ ایگزیکٹو کمیٹی ءِ باسک نیاز مھمد مرچی گدان ءَ ساڑی بوتگ۔
پنچ شمبے ءِ روچ ءَ زور بیگواھیں اکرار بلوچ ءُ سگیر اھمد ءِ گھار نسیدہ بلوچ گدان ءَ اتکگ ءُ وتی زھرشانی یاداشت کرتگ۔ آئی گوشگ اِنت کہ منی براس سگیر اھمد ءُ اکرار بلوچ کراچی ءَ روگ ءَ بوتگ اَنت کہ پاکستانی پوج ءَ چہ اورماڑہ ءَ آوار جتگ اَنت۔
نسیدہ بلوچ ءَ گوشتگ کہ من پہ وتی براتانی آجوئی ءَ رھبند ءِ رد ءَ ءُ پرایمنی ءَ جھد کنگ ءَ آں ۔ بلے بژن اِنت کسے ءَ ھم مارا ڈیھ ءِ کانود ءِ رد ءَ انساپ نہ داتگ، چہ ایشی آسر ءَ مئے کھول سسائی جنجالانی دیمپان اِنت۔
آئی گوشتگ کہ نہ سگیر اھمد ءُ اکرار بلوچ آجو بوتگ اَنت نہ آیانی بابت ءَ مئے کھول ءَ سرپدی دیگ بوتگ۔ اے یک بژنی گپے ما ایشی ءَ ایر جن ایں۔ سگیر ءُ اکرار بلوچ ءَ ھوار درستیں بیگواھیں مردم آجو کنگ بہ بنت۔
