کیچ: بلوچ وومن پورم ءِ سروک ڈاکٹر شلی بلوچ ، بی وائی سی کیچ ھنکین ءِ باسک سید بی بی ءُ نازگل بلوچ ءِ نام پورتھ شیڈول ءَ ھوار کنگ بیتگ اَنت۔
اھوالکار ءِ رد ءَ چار اکتوبر 2025 ءَ تربت ءَ زور بیگواھیں شبیر بلوچ ءِ کھول ءِ نیمگ ءَ بیتگیں زھرشانی ءَ بھر زورگ ءِ پژدر ءَ ڈاکٹر شلی بلوچ، سید بی بی ءُ نازگل ءِ بگیری ءَ ایپ آئی آر کنگ ءَ پد آیانی نام پورتھ شیڈول ءَ ھوار کنگ بیتگ اَنت۔
آیانی نامانی پورتھ شیڈول ءَ ھوار کنگ مکران ہائی کورٹ بار، کیچ بار، گوار بار ءُ پنجگور بار ایشن ءُ بی این پی ءُ آدگہ بھرگاں ایر جتگ ءُ گوشتگ کہ بلوچ سیاسی کارکن جنینانی ترسینگ بژنی گپے ءُ سیاسی کارکنانی توار ءِ دارگ ءُ پہ بلوچ ءِ ھکاں چست بیتگیں زرمبشت ءِ دارگ ءِ کوشست اِنت۔
چہ ایشی ءَ پیش ھم ڈاکٹر شلی بلوچ ءُ آدگہ سیاسی کارکن کیچ، آواران، گوادر ءُ شال ءَ جتائیں زھرشانیانی پژدر ءَ ایپ آئی آر کنگ بیتگ اَنت۔
