کیچ: بلوچ کجھتی کمیٹی ءِ نیمگ ءَ چار شمبے ءِ روچ ءَ بلوچ چکچینی ءِ بگیری ءَ ھوشاپ ءَ زھرشانی روانکے کشگ بوتگ۔ زھرشانی ءَ نودربر، جنین ءُ زھگاں ھوار سدانی کچ ءَ مردماں بھر زرتگ۔
زھرشانی کنوکیں مردماں بینر ءُ پلے کارڈ دستاں بوتگ کہ پلے کارڈانی سر ءَ جتائیں اوگام نبشتہ بوتگ۔ زھرشانی کنوکیں مردماں زوریں بیگواھی ءُ دروگیں میڑاں زور بیگواھیں مردمانی ناھکیں کوش ءِ بگیری ءَ اوگام جتگ۔
زھرشانی کوکیں مردماں گوں وتگڑیں سرکار ءُ مردمی ھکانی ادارھاں لوٹ کرتگ ءُ گوشتگ کہ بلوچستان ءَ زور بیگواھیں درسیں مردم آجو کنگ بہ بنت، زوریں بیگواھی ءُ دروگیں میڑاں زور بیگواھیں مردمانی ناھکیں کوش بند کنگ بہ بیت۔
اے زھرشانی روانک ھما زھرشانیانی درچ اِنت کہ بلوچستان ءِ کنڈ کنڈ ءَ برجاہ اَنت۔ بلوچ یکجھتی کمیٹی ءِ نیمگ ءَ بلوچستان ءَ ریاستی زوراکیانی بگیری ءَ اسلام آباد پریس کلب ءِ دیم ءَ برجاھیں زھرشانی نندانک ھلاس کنگ بوتگ ءُ مرچی کاروان دیم پہ شال ءَ پیداک اَنت۔
