بلوچ اسٹوڈنٹس کونسل اسلام آباد ءَ وتی شنگ کرتگی درشانے ءَ گوشتگ کہ بی ایس سی (اسلام آباد) ایوک ءُ تھنا پہ نودربرانی مُچی ءُ شاتکامی ءِ اوست ءُ بانداتءَ وتی سالی مراگش ءَ برجم نہ دار ایت بلکیں بی ایس سی سرپد بیت کہ اے مراگش بلوچ نودربرانی سیاسی اسکولنگ ءِ بھر ے۔ ھر سال ءِ وڑ ءَ اے سالءَ ھم مراگش بلوچ نودربرانی سیاسی ھیلکاری ءُ زانت ءِ وسیلگ ءِ بستارے دارایت۔
آئی ءَگوشتگ کہ بی ایس سیءِ مدام جُھد ھمیش اِنت کہ آ وتی باسکاں پکری، لیکھی ءُ چہ کردی زانت ءَ آشکار بہ کنت دانکہ آ وتی رژن پگریں ھیال ءُ بودشتاں گوں نوکیں باندات ءُ چاگردے ءِ سازگ ءَ کردے پیلو بہ کن اَنت۔ اے مراگش سیاسی اسکولنگ ءِ نیمگ ءَ برگ ءِ گامگیجے ءُ ایشی ءَ اَبید ما اے سیاسی مراگش ءُ برنامھانی کُمکءَ بلوچ نودربراں ھما پگرءُ پلسپہءَ گوں بندوک بہ کن ایں کہ مارا بلوچ سیاست ءِ بزرگتریں رھشون بابا ھیر بکش مریءَ شوناتگ اَنت۔سالی مراگش پینل ڈسکشن،تاک،باوست،گُشتانکءُ پیپر پیشانک دابیں برنامھاں چہ نوکیں گپءُ تْران پچ کنت کہ اِشانی وسیلگءَ ادارہ پہ وتی باسکانی سیاسی ھیلکاریءُ پکری رُدومءَ توانا کنگءَ دار ایت۔چوناھا ادارتی بُنیادءَ بی ایس سی ءِ وژن پہ بلوچ نودربراں گیِش اِتگ کہ آیاناں انوگیں اھدءِ نوکیں جھانی سائنسی،ٹکنالوجیءُ کردی ساچشتءُ وانشتاں گوں ھمگرنچی یے پیداک کنگءَ سیکگی کُلیں راہ ءُ دراں شوھازگءِ تبے دیمءَ بیا ر ایت۔پرچاکہ جھان ءَ ھما راج مان اَنت کہ آیانی تبءُ روشت مُچانکی درگتءَ ھمک مٹیءُ بدلیءَ گوں زانشتی ھاٹیگءَ وتی تہءَ جاہ بدینت۔
آئیءَ گوشتگ کہ بابا ھیر بکش مریءِسیاسیءُ پکری دورچاریءَبلوچ سیاسی ادارھانی لیکھی جوڑشتءُتچکیءِ تہءَ اھدسازیں کردے پیلوکُتگ۔باباءِ شھزانتیں ھیالاں بلوچ سیاستءَ را بے سرءُ سامانیءُ وت ماں وتی جیڑہءُ جنجالاں چہ کشّ اِتگءُ تھنا لیکھی بُنھشت ایر کنگءِ ھواریءَ ھمک ائیبءَ چہ پلگار اِتگ۔انچوش کہ بلوچءَ را سیاسی وژنءِ دیگءِ ھمرائیءَ سیاسیءُ لیکھی رھشونی ئے کُتگ۔بابا مری بلوچ سیاسی راجدپترءِتہ ءِ ھما بامرد اِنت کہ وتی مھکمیں پکرءُ ھیال ءِ برورد ءَ بلوچ راجدوستی ءَ را سائنسی دورشمےءِ دیگ ءَسوبمند بوتگ۔باباپکری درگتءَ ھما اَزیمیں نام اِنت کہ بلوچ سیاست ءِ تہ ءَ در سیاسی ءُ در آشوبی روشتانی دیمءَ گوں منانکاں اوشتوک بوتگ ءُ بلوچ ورنایاں راجدوستی ءِ یک سَلھیں راھے پیشدارگ ءَ سرجمیءَ سوبمند بوتگ۔ اگاں ما بابامری ءِ بلوچ راجدوستی ءِ ھیال ءَ را کسانیں بھرے ءِ تہ ءَ بیارایں۔ گُڑا بابا بلوچ راجدوستی ءَ سیاسی پروگرامے سرپد بیت کہ پہ بلوچ راجمانءِ سازگءَ کسےبلوچ ءِ زمینی راستیانی بنیا دءَ کردی دروشُمءَ کارءِ پِڑءَ وتی کرد ءِ پیلو کنگءَ پہ جُھد ءَ بہ کنت ۔
آئی ءَ گوشتگ کہ بی ایس سی بلوچ نودربرانی سیاسی،کردی ءُ زانشتی ادارھےءِ بُنشونءَ بلوچ ورنایانی زمہ واریءُ کردانی دیمءَ آرگءُ مُھکم کنگءِ بُنیادءَ ھروھدءَ جتائیں مراگش اَڈ دنت دانکہ ورنا وتی زمہ واریءُ کردسازیءِ جُھدءَ پش مہ کپ اَنت۔اگاں راجےءِ وانندگیں مھلوک بے سوادیءِ آماچ بہ بیت گُڑا آ چاگردءَ زانشت ءُ ساچشت وھدءِ مُجاں اندیم بیت۔ پرچاکہ راجانی گوناپ دیوک آئیءِ سوھو ءُ زانوگریں ورناءُ مھلوک اِنت۔ پمیشکہ بلوچ ورنایانی زمہ واریاں ءُ پہ کردءِ بُنزہ ءَ پیشدارگءَ بی ایس سی وتی باسکءَ بودناک،زانشتیءُ توانمند جوڑ کنگ ءِ مُھکمیں پھناتے وتی سیاسی وژن ءِ تہءَ دار ایت۔ پہ ادارہءَ وتی باسکانی زانشت،ساچشتءُ بودناکی اسل مڈی اَنت۔
