نیدرلینڈز: بلوچ نیشنل موومنٹ ( بی این ایم ) ءِ نیمگ ءَ ھزادر ءِ ھند زھری ءَ پاکستانی پوج ءِ برجاھیں زوراکیانی بگیری ءَ اوتریکت ءَ زھرشانی کنگ بیتگ۔ زھرشانی ءَ بی این ایم ءِ باسکاں بازیں کچے ءَ بھر زرتگ۔
زھرشانی کنوکیں مردماں پوج ءِ دست ءَ زور بیگواھیں مردم ءُ بی وائی سی ءِ بندیگیں سروکانی اکساں ھوار بینر ءُ پلے کارڈ دستان بیتگ اَنت۔ زھرشانی کنوکیں مردماں زوریں بیگواھی ءُ ریاستی زورگپتی ءُ زوراکیانی بگیری ءَ اوگام جتگ۔
آیاں تران کرتگ ءُ گوشتگ کہ ھزدار ءِ ھند زھری ءَ پاکستانی پوج ءِ نیمگ ءَ یکشل ءَ زوراکی برجاہ اِنت اے میان ءَ چہ پوج ءِ تیر ءُ بمبگواریاں باز مردم بیران بیتگ ءُ اے میان ءَ چہ جتائیں ھنداں پاکستانی پوج ءَ بازیں مردم آوار جتگ ءُ بیگواہ کرتگ۔
آیاں گوشتگ کہ پاکستانی پوج ءَ ھمے بھتام جتگ من اود ءَ ناشرکارانی بگیری ءَ لشکرکشی کرتگ ءُ ناشرکار کشتگ اَنت، ھمے ناھک ءَ کشگ بیتگیں مردمانی تہ ءَ دو سالی زھگ ھم ھوار اَنت اگاں اے مردم ناشرکار اَنت گڑا اے کسانیں زھگ چون کوہ ءَ شت ءُ پوج ءِ بگیری ءَ جنگ کرت کن اَنت۔
آیاں گوشتگ کہ ما گوں اکوام متھدہ ءَ ھوار گوں درسیں انسانی ھکانی ادارھاں لوٹ کن ایں کہ آ بلوچستان ءَ برجاھیں زوراکیانی بابت ءَ پاکستان ءَ جست بہ کن اَنت۔ بلوچستان ءِ آجوئی ءُ بلوچ راج ءِ ھکانی پلہ مرزی ءَ بہ کن اَنت۔
