بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَ براتیں ھمساھگیں ڈیھ اوگانستان ءِ سر ءَ پاکستان ءِ ارش گوں ترندیں دانکاں ایر جتگ ءُ گوشتگ کہ پاکستان ءِ اے گامگیج نہ تھنا میان استمانی کانود ءِ بگیری اِنت، بلکیں آجوئیں اوگانستان ءُ شرپمندیں اوگانانی شرپ ءِ لگتمالی اِنت۔ بی این ایم اے وڑیں جاوراں گوں برات گونگیں اوگاناں سرجم ءَ یکجھتی کنت۔
آئی ءَ گوشتگ کہ پاکستان ءَ رد مار اتگ کہ اوگانستان ءَ تالبان سرکار ءَ پد سیمسر ءِ جیڑہ وتسر ءَ وت ھلاس بیت ءُ کابل اسلام آباد ءِ نپانی چیردست بیت، بلے اوگان سرکار پہ وتی واک ءُ شرپ ءِ زندگ دارگ ءَ گوں پاکستان ءَ ھوار نہ بیتگ۔ ھمے بنیاد ءَ پاکستان ءَ یک آجو، وتواک ءُ ھمساھگیں ڈیھے ءِ سر ءَ ارش کرتگ بلے گیرتمندیں اوگان راج ءَ پاکستان ءَ یک گوستانکی پسوے داتگ۔
آئی ءَ گوشتگ کہ بلوچ نیشنل موومنٹ ھمے سرپد بیت کہ اے ارش اسل ءَ پاکستان ءِ ھما کوھنیں پالیسانی درچ اِنت کہ مدام اوگانستان ءِ تہ ءَ تھی جیڑھانی ودی کنگ ءَ دزمانجنی کرتگ، لشکری زوراکی ءُ جیڑھانی بنیاد ءَ وتی مزن پیش کنگ ءِ جھد کرتگ دانکہ اوگانستان مدام جیڑھانی دیمپان بہ بیت ءُ یک نزوریں ھمساھگے ءِ پیم ءَ پاکستان ءِ چیر دست بہ بیت۔ ھمے مول ءِ بنیاد ءَ پاکستان ریاست ءَ اوگان سرڈگار داں چل سال ءَ وت ماں وتیں جنگ ءِ نیمگ ءَ برگ ءَ بنکی کرد پیلو کرتگ ءُ دری ارشکارانی دست ء راست جوڑ بیتگ۔
آئی ءَ گوشتگ کہ ما بلوچ راج ءُ گل ءِ بستار ءَ گوں اوگان مھلوک ءَ سرجم ءَ یکجھتی کنگ ءِ جار ءَ جن ایں۔بلوچستان ءُ اوگانستان ءِ مھلوک ءَ گوستانک، زمینی کچ ءُ کساس، دودمان ءُ ھواریں دژمن ءِ بگیری ءَ ھواری ءَ جھد کرتگ۔ چونیں ھم دری توانمندی ءَ اے ھک نیست کہ اے سیادیاں نزور بہ کنت یا براتیں راجانی میان ءَ دژمنی ءِ بدگمانی ودی بہ کنت۔
بی این ایم ءِ چیئرمین ءَ گوشتگ کہ بلوچ نیشنل موومنٹ اے ارش ءَ پہ اے دمگ ءَ نوکیں زوراکی یے ءِ شوربندی ءِ بندات سرپد بیت ءُ پاکستان ءِ چیردستیں پشتونانی گون ءَ لوٹ کن ایں کہ آ پاکستان ءِ اے تکشام ءَ گوں سنگینی ءَ پچار اَنت چی ءَ کہ پاکستان ءِ اے گامگیج ءِ بنیاد پشتونانی چکچینی، پشتون سرڈگار ءِ سر ءَ جیڑہ ودی کنگ ءُ پنجاپی پوج ءِ چیردستی ءِ جیڑہ ءِ بھر اِنت۔ اگاں پشتون پارلیمانی پارٹی اے وتگڑیں راجی سلامتی ءِ نام ءَ گوں پاکستان ءَ ھوار بہ بنت گڑا ایشی سان سرجمیں دمگ ءِ سر ءَ کپ اَنت۔
