بلوچ یکجھتی کمیٹی ءِ سروک سمی دین بلوچ ءَ وتی شنگ کرتگیں تامربندے ءَ گوشتگ کہ گوستگیں شش ماہ بیت بی وائی سی ءِ سروک سیاسی بنیاد ءَ جوڑ بیتگیں ارزی ءَ درکانودی زندانی کنگ بیتگ اَنت۔ آیانی تہ ءَ ڈاکٹر ماہ رنگ بلوچ، سبگت اللہ شاہ جی بلوچ، بیبرگ بلوچ ، بیبو بلوچ ءُ گلزادی بلوچ ھوار اَنت۔ آ سیاسی کارکن اَنت ءُ آیاں پہ وتی مردمانی ھک ءُ بلوچستان ءَ بیوکیں زوراکی ءُ زوریں بیگواھیانی بگیری ءَ توار چست کرتگ کہ آ مرچی زوراکیانی نشانگ اَنت۔
آئی ءَ گوشتگ کہ بی وائی سی ءِ سروکانی درکانوی بندیگی ءَ ھپت ماہ سرجم بوگ ءَ اِنت آیانی کیس پہ زانت دراجکش کنگ بوگ ءَ اِنت۔ گوستگیں شش ماہ بیت کہ سی ٹی ڈی ءَ وتی یک رپورٹے ھم پیش نہ کرتگ۔ آمید گس ھم آیانی وھد ءَ گیش کنگ ءُ گوں آیاں ناھکی کنگ ءَ اِنت۔ گوستگیں شش ماہ ءِ ریمانڈ ءَ پد آ شال ءِ ھدہ زندان ءَ دیم دیگ بیتگ اَنت۔ اود ءَ پہ آمیدگس ءِ ریمانڈ ءَ آیانی وھد گیش کنگ بوگ ءَ اِنت۔ بژنی گپ ایش اِنت کہ زندان ءِ انتزامیہ ءَ گوشتگ کہ بی وائی سی ءِ سروکانی نوں جست ءُ پرس آمیدگس ءَ ابید زندان ءَ بیت۔
سمی دین بلوچ ءَ گوشتگ کہ زندان ءَ جست ءُ پرس ءِ مول ھمیش اِنت کہ آیانی کھول ءُ وکیل ھم زندان ءَ اتک مہ کن اَنت۔ اود ءَ درسیں آمیدگس ءِ پیسلہ ءَ وتی ھساب ءَ بہ کن اَنت۔
آئی ءَ گوشتگ کہ ما گوں درسیں انسانی ھکانی ادارہ، سول سوسائٹی ءَ ھوار درسیں بھرگاں سیادی داروکیں مردماں لوٹ کن ایں کہ اے زوراکیانی بگیری ءَ توار چست بہ کن اَنت ءُ شریں وڑے ءَ پٹ ءُ پول ءُ کانودی کاروائی کنگ ءُ بی وائی سی ءِ سروکانی یل کنگ ءِ لوٹ ءَ بہ کن اَنت۔
