بلوچ نیشنل موومنٹ ( بی این ایم ) ءِ جارکش ءَ ھزدار ءِ ھند زھری ءَ پاکستانی پوجءِ نیمگ ءَ بیتگیں انوگیں زوراکی ایر جتگ اَنت ءُ گوشتگ کہ پاکستانی پوج ءِ زمینی کاروائیاں ھوار ڈرون ارش ءِ آسرءَ مرد، جنینءُ زھگ ناھک ءَ کشگ بیتگ اَنت۔ یکبرے پد ءَ پاکستان ریاست ءِبلوچ راج ءِبگیری ءَ چکینی پاشک بیتگ۔
آئی ءَ گوشتگ کہ آبادیانی سر ءَ ڈرون ارش، تیرگواری ءُ گسانی سر ءَ بیڑ برگ پاکستان ءِ جنگی میارباریانی نوکین ءُ ترسناکیں درچے۔ سرجمیں کھول نشانگ کنگ بوگ ءَ اَنت، میتگ سوچگ بوگ ءَ اَنت ءُبے میاریں انسان تاوان دیگ بوگ ءَ اَنت، بلے میان استمانی توانمند بے توار اَنت۔
آئی ءَ گوشتگ کہ بی این ایم وتی درسیں چپٹراں گوش ایت کہ آ پاکستان ءِ سپارتجاہ، کونسل ءُ میان استمانی انسانی ھکانی ادارھانی دیم ءَ زھرشانی بہ کن اَنت ءُ سرپدی تکشام برجاہ بدار اَنت دانکہ اے زوراکی پاشک بہ بنت ءُ میان استمانی تک زوت دزمانجنی بہ کن اَنت۔
آئی ءَ گوشتگ کہ بی این ایم گوں اکوام متھدہ، انسانی ھکانی ادارہ ءُ جمھوری سرکاراں لوٹ کنت کہ آ وتی بے تواری ءَ بہ پروش اَنت ءُ پاکستان ءِ بلوچستان ءَ برجاھیں چکچینی، زوریں بیگواھی ءُ درکانودی کوشانی وڑیں میارانی جست ءَ بہ کن اَنت۔
آئی ءَ گوشتگ کہ ما گوں بلوچ ءُ جھان ءَ لوٹ کن ایں کہ آ زھری ءَ سانمند ءُ زوراکیانی آماچیں مردمانی گون ءَ ھمدردی بہ کن اَنت۔ مئے شھیدانی ھون زوال نہ بنت ءُ داں بلوچستان ءِ آجوئی ءَ جھد برجاہ بیت۔
