کیچ: تمپ ءَ پاکستانی پوج ءَ جوڑ کرتگیں کشندہ ٹولی ءِ کارمنداں میرین نامیں مردمے ءِ گس ءَ دستی بمب ارش کرتگ۔
زرمبش جھگیر ءِ رد ءَ اے ارش مرچی شپ ءِ نُھ ءَ تمپ ءِ میتگ کونشکلات ءَ میرین بلوچ ء داد مھمد ءِ گس ءَ بیتگ کہ کشندہ ٹولی ءِ کارمنداں دو دستی بمب چگل داتگ۔ تراک ءِ آسر ءَ میرین ءُ آئی لوگبانک نسیمہ بلوچ ٹپی بیتگ اَنت۔
ھندی بنشون ءِ رد ءَ نسیمہ بلوچ ءِ جاور ناگیگ اَنت کہ پہ الاج ءَ نادراھجاہ ءَ برگ بیتگ۔
انچوش گوشگ بوگ ءَ لھتیں ماہ پیش ھم کشندہ ٹولی کارمنداں میرین بلوچ ءِ زامات شپیک بلوچ ء درمھمد ءِ گس ءَ دستی بمب ارش کرتگ۔
چوش کہ چہ ایشی ءَ پیش ھم تمپ ءَ پاکستانی پوج ءِ جوڑ کرتگیں کشندہ ٹولی ءِ کارمنداں بازیں گسانی سر ءَ ارش کرتگ اَت۔ ھمے میتگ ءَ بلوچی زبان ءِ آشوبی گشندہ استاد مھناج مکتار ءِ گس ءِ سر ءَ باز بر ءَ ریاستی ادارھانی کارمنداں ارش کرتگ۔
