بلووچ راجدوستیں سروک رھیم بلوچ ایڈوکیٹ ءَ وتی شنگ کرتگیں درشانے ءَ گوشتگ کہ پاکستان ءِ انوگیں برزی ارش کہ اوگانستان ءِ کابل ءُ پکتیا ءَ بیتگ اَنت تچکیں زوراکی یے۔ اے اوگانستانءِ آجوئی ءُ وتواکی ءِ تچک ءَ بگیری اِنت ءُ میان استمانی کانود ءِ لگتمالی اِنت من ایشی ایر جن آں۔
آئی ءَ گوشتگ کہ پاکستانی پوج ءُ آئی سلاہ بندانی سر ءَ ارشانی نیمون کنگ ءِ یک نزوری یے۔ پشتون ءُ بلوچ چہ اوگانستان ءَ پاکستان ءِ سر ءَ میزائل ارش نہ کن اَنت، بلکیں پشتون ءُ بلوچ آجوئی ءِ جنگول کہ پاکستان ءِ چیردستیں ھیبرپکتونواہ ءُبلوچستان ءَ پاکستانی پوج ءُ آئی پھازداریں کارمندانی سر ءَ ارش کنگ ءَ اَنت۔ آ وتی وتی سرڈگار ھیبرپکتواہ ءُبلوچستان ءَ نشتگ ءُ ارش کنگ ءَ اَنت۔
بلوچ سروک ءِ گوشگ اِنت کہ اگاں بلوچستان ءَ بلوچ راج ءِ زر ءُ تیاب، مادن ءُ آدگہ مڈیانی نوک آباد کاریں لٹ ءُ پل بہ بیت یا پکتونواہ ءِ مڈیانی دستیگ کنگ ءِ پندل اے درس ھمے چیز ءَ پدر کن اَنت کہ پاکستان یک بدنیتی یے ءِ سر ءَ جوڑ بیتگیں ریاستے، آ نہ تھنا بلوچستان ءُ ھیبرپکتونواہ ءَ انسانیت ءِ بگیری ءَ جنگی میارباری کنگ ءَ اِنت بلکیں وتی ھمساھگیں ڈیھانی بگیری ءَ زوراکی ءُ ناشرکاری کنگ ءَ اِنت۔
رھیم بلوچ ایڈوکیٹ ءَ گوشتگ کہ پاکستان ءِناشری پہ سرجمیں جھان ءَ ھوار ھمے دمگ ءِ لکانی کچ ءَ مردماں یک ٹوھیں ترسے اِنت۔
