پاکستانی پوج ءِ دست ءَ چہ ھزدار ءَ زور بیگواہ کنگ بیتگیں گنی بلوچ ءِ کھول ءَ وتی شنگ کرتگیں درشانے ءَ گوشتگ کہ گنی بلوچ ءِ زوریں بیگواھی انسانی ھکانی بگیری اِنت. زوریں بیگواھی نہ تھنا میان استمانی کانود بلکیں انسانی شرپ ءُ ھمک راھبند ءِ تچک ءَ بگیری اِنت۔
آئی ءَ گوشتگ کہ یک مردمے ءَ چہ گس، واھشت ءُ کھول ءَ پلگ تھنا یک مردمے ءِ بیگواھی نہ اِنت بلکیں سرجمیں کھول ءِ مچی سزا دیگ اِنت۔
کھول ءَ گوشتگ کہ جھان ءِ درسیں راجاں منّ اتگ کہ کسے ءَ بے کیس، بے سبوت ءُ بے ھال دیگ ءَ بیگواہ کنگ یک میارے۔ بلے اد ءَ انساپ ءِ جاہ ءَ بے تواری ءُ کانود ءِ جاہ ترس ءَ گپتگ۔
آئی ءَ گوشتگ کہ گنی بلوچ ءِ وڑیں ورنایانی زوریں بیگواھی مارا ھمے ترانگ ءَ دنت کہ وھدے کانود نزور بہ بیت گڑا زوراک توانمند بیت۔ ما تھنا یک مردمے ءِ آجوئی ءَ لوٹگ ءَ نہ ایں، ما انسانی شرپ، انساپ ءُ راھبند ءِ واکداری ءِ لوٹ ءَ کن ایں۔
