بلوچ لبریشن آرمی (بی ایل اے) ءِ جارکش جیھند بلوچ ءَ وتی شنگ کرتگیں درشانے ءَ گوشتگ کہ سرمچاراں شش جتائیں کاروائیاں کلات، پَنجگُور، تُربَت ءُ مچ ءَ زورگریں پاکستانی پوج ءُ آئی چریک نشانگ کرتگ اَنت، یک مردمے دزگیر کرتگ ءُ مزنیں شھدگ بستگ۔
آئی گوشتگ کہ بی ایل اے ءِ سرمچاراں کلات ءِ ھند زاوہ ءَ زورگریں پاکستانی پوج ءِ یک چوکی یے گوں راکٹ ءُ آدگہ ٹوھیں سلاھاں نشانگ کرتگ۔ چہ ایشی آسر ءَ دو کارمند مرتگ ءُ باز ٹپی بوتگ۔ اُرش ءِ وھد ءَ پوج ءِ ٹپی بوتگیں لھتیں کارمنداں وتی سنگر یل داتگ ءُ تتکگ اَنت۔
آئی گوشتگ کہ بی ایل اے ءِ سرمچاراں گوستگیں روچ ءَ کلات ءِ ھند منگچر ءَ مزنیں شھدگ بستگ کہ داں یک ادارے ءَ دگ بندی برجاہ بوتگ۔
آئی گوشتگ کہ سرمچارانی یک دگہ ٹولی یے ءَ چہ منگچر بازار ءَ زھور نامیں مردمے دزگیر کرتگ کہ آئی جست ءُ پرس برجاہ اِنت ءُ بلوچ راجی آمیدگس آئی بابت ءَ پیسلہ کنت۔
جارکش ءَ گوشتگ کہ بی ایل اے ءِ سرمچاراں 30 ستمبر ءَ پَنجگُور ءِ ھند سبزآپ ءَ سی پیک دگ ءَ پاکستانی پوج ءِ کاروان ءِ یک گاڑی یے گوں تراکناکیں شورھاں نشانگ کرتگ۔ چہ ایشی آسر ءَ پوج ءِ چار کارمند مرتگ ءُ چار ٹپی بوتگ۔
آئی گوشتگ کہ بی ایل اے ءِ سرمچاراں آدینگ ءِ روچ ءَ تُربَت ءِ ھند ھیرونک ءَ زورگریں پاکستانی پوج ءِ چریک لکمیر ء سید مھمد جھمنند شاپک تیرگواری کرتگ ءُ کشتگ۔
آئی گوشتگ کہ لکمیر زورگریں پاکستانی پوج ءُ چیریں ادارھانی کارمندانی جوڑ کرتگیں کشندہ ٹولی ءِ بھرے بوتگ۔ آ شاپک، شھرک ءُ کش ءُ پھناتانی ھنداں گساں بیڑ برگ ءُ ورنایانی بیگواھی ءُ زورگریں پوج ءِ کمکاری ءَ ھوار بوتگ۔ آ ورنایانی دلسیاہ کنگ ءُ سلاہ ءِ زور ءَ پہ پوج ءَ چاریگی ءِ کار گرگ ءَ ھوار بوتگ۔
آئی گشتگ کہ زورگریں پوج ءَ لکمیر ءَ سرجم ءَ موکل داتگ کہ آ دمگ ءَ منشیات ءِ باپاری ءَ ھوار مردم دلسیاہ بہ کنت۔ گوستگیں روچاں چریک ءَ یک مردمے گوں آئی لوگبانک ءُ کسانیں زھگے ءَ ھوار گاڑی ءِ سر ءَ لگت داتگ ءُ کشتگ۔ راجی میارباری ءِ سر زد بوگ ءَ لکمیر بی ایل اے ءِ نشانگی لڑ ءَ ھوار بوتگ کہ سرمچاراں نشانگ کرتگ ءُ کشتگ۔
جارکش ءَ گوشتگ کہ سرمچاراں آدینگ ءِ روچ ءَ مچ ءَ پولیس تانہ گوں دستی بمب ءَ نشانگ کرتگ۔
جیھند بلوچ ءَ درشان ءِ گڈی ءَ درسیں اُرشانی زمہ واری من اِتگ۔
