تربت ءَ زور بیگواھیں شبیر بلوچ ءِ کھول ءِ نیمگ ءَ آئی زوریں بیگواھی ءَ نُھ سال سرجم بوگ ءَ زھرشانی کنگ بیتگ۔ زھرشانی ءَ شبیر بلوچ ءِ کھول ءَ ھوار سیاسی ءُ چاگردی گلانی سروک ءُ کارکن، جتائیں بھرگاں سیادی داروکیں مردماں بازیں کچے ءَ بھر زرتگ۔
زھرشانی روانک ءَ ھواریں مردماں زوربیگواھیں شبیر بلوچ ءِ اکس، بینر ءُ پلے کارڈ دستاں بیتگ اَنت کہ آیاں پہ شبیر بلوچ ءَ ھوار درسیں بیگواھیں مردمانی آجوئی ءَ لوٹ کرتگ۔ روانک ءَ شھر ءَ جتائیں جاھاں تر ءُ گرد کنگ ءَ پد شھید پدا اھمد چاراہ ءَ مُچ بیتگ۔
چہ زھرشانی جاہ ءَ زور بیگواھیں شبیر بلوچ ءِ لوگبانک زرینہ بلوچ ءَ تران کرتگ ءُ گوشتگ کہ آ وھد ءَ منی ءُ شبیر ءِ سور بیتگ گڑا ما دوئیں کسان بوتگ ایں۔ شبیر بلوچ چہ منی چمانی دیم ءَ آوار جنگ ءُ بیگواہ کنگ بیتگ۔
آئی ءَ گوشتگ کہ چہ شبیر بلوچ ءِ زوریں بیگواھی ءَ پد ما یکشل ءَ جھد کنگ ءَ ایں، بلے اے نُھ سالانی میان ءَ درسیں در ٹک اتگ اَنت مارا ھچ جاہ ءَ انساپ نہ رستگ۔
زرینہ بلوچ ءَ لوٹ کرتگ ءُ گوشتگ کہ من ءَ ھمے بہ گوش اِت کہ من شبیر بلوچ ءِ لوگبانک آں یا جنوزام آں۔ ریاست ءَ مارا ھمک وھد ءَ بےتوار کنگ ءِ جھد کرتگ بلے ما بے توار نہ بہ ایں۔
آئی ءَ گوشتگ کہ من ریاست ءَ وتی اے یازدہ سال ءِ جھدانی پسو ءَ لوٹ آں ءُ من چہ ریاست ءَ وتی بیگواھیں شبیر بلوچ ءَ لوٹ آں۔
