بلوچ یکجھتی کمیٹی ءَ وتی شنگ کرتگیں درشانے ءَ گوشتگ کہ زھری ءَ گوستگیں دوھپتگ بیت کہ لشکرکشی ءِ میان ءَ لس شھری نشانگ کنگ بوگ ءَ اَنت۔ بمبگواریانی آسر ءَ لس شھریانی شھیدی ءِھال اِنت کہ آیانی تہ ءَ دو جنین ھم ھوار اِنت۔ مردم بے گس ءُ ترس آماچ اَنت۔ گس، کشار، آپ ءِ سولر سسٹم ھم تباہ کنگ بوگ ءَ اَنت۔
آئی ءَ گوشتگ کہ سرجمیں ھند انگر اِنت ءُ درسیں راہ ءُ در بند کنگ بیتگ اَنت، ورگی سامان ءُ درمان ھم نیست۔ نادراھجاہ چہ ڈاکٹر ءُ بنیادی آسراتیاں زبھر اَنت ءُ دامگ ءُ نیٹوک ھم بند اَنت۔ گوستگیں شپ ءَ بند آرگ جنگ بیتگ گسانی بیڑ برگ ءِ میان ءَ جنین، زھگ ءُ کماش آزار دیگ بیتگ اَنت۔ اے ویل انسانی ھکانی پادمالی ءُ جنگی میارباریاں پیش دار اَنت۔
آئی ءَ گوشتگ کہ رسانکدر ءِ سر ءَ پابندی اِنتءُ کمکی سامان ھم دارگ بوگ ءَ اَنت دانکہ راستی چیر دیگ بہ بیت۔ اے ھچ وڑ ءَ اوپار کنگ نہ بیت۔ لس شھریانی نشانگ کنگ، بنکی انسانی ھکانی تباھی، کمکانی دارگ میان استمانی انسانی ھکانی تچکءَ بگیری اِنت۔
آئی ءَ گوشتگ کہ ما ھمے لوٹ ءَ کن ایں کہ زھری ءَ بجلی، وردن، الاج ءُ رھوتی آسراتی زوت دیگ بہ بنت۔ لس شھریءُ آیانی چیزانی سر ءَ ارش زوت بند کنگ بہ بنت۔ رسانکدر ءُ انسانی ھکانی سروک ءُ کمکی ادارہ دارگ مہ بنت۔ انسانی ھکانی پادمالی ءُ جنگی میارباریانی پٹ ءُ پول کنگ ءُ زمہ وار جست گرگ بہ بنت۔
آئی ءَ گوشتگ کہ زھری اے وھد ءَ ناگیگیں جاورانی آماچ اِنت۔ گوں اکوام متھدہ، میان استمانی انسانی ھکانی ادارھاں لوٹ کن ایں کہ آ زوت دزمانجنی بہ کن اَنت ءُ پہ شھریانی جان ءُ مال ءِ پھریزگ ءَ دلجمی بہ دے اَنت ءُ زمہ واراں جست بہ کن اَنت۔
