بلوچ نیشنل موومنٹ ( بی این ایم )ءَ وتی شنگ کرتگیں درشانے ءَ گوشتگ کہ بی این ایم ءِ کلانھیں سروک ءُ دیریگیں باسک کازی ھاشم بلوچ چہ نادراھی ءَ پد بیران بیتگ۔ آ بلوچ راجی زرمبشت ءِ باسک، لیکھی سروک ءُ سکا جھد کنوکیں سنگتے زانگ بیتگ۔
آئیءَ گوشتگ کہ کازی ھاشم جاؤ ءَ چہ پارٹی ءِ بنداتی سنگتاں زانگ بیتءُ آئی گوں استاد الی جان ءُ ڈاکٹر منان جان ءَ ھوار گل ءِبنیادءِ مھکم کنگ ءَ جوانیں کرد پیلو کرتگ۔
جارکش ءَ گوشتگ کہ 25 اگست 2009 ءَ جاؤ ءِ بازار ءَ شھید التاپ بلوچ ءِ یاد ءَ پروگرامے ءِ میان ءَ ریاستی ادارھاں آیانی سر ءَ ارش کرتگ آ سکاٹپی بیتگ، بلے چہ ایشی ءَابید آئی وتی جھد برجاہ داشتگ۔ پد ءَ چہ پوج ءِ کاروائیانی آسر ءَ آئی میتگ تباہ بیتگ، ھمے سوب ءَ آ روکپتی بلوچستان ءَ باھوٹ بیتگ۔ چہ ناگیگیں جاوراں ابید آ گوں وتی پارٹی ءَ ھمگرنچ بیتگ۔
آئی ءَ گوشتگ کہ کازی ھاشم بلوچ نوکیں پدریچ ءِ سروکی ءُ سیاسی زانشتی ھیلکاری ءَ جوانیں کرد پیلو کرتگ۔ 2013 ءَ آھما وھد ءِ کارگشاد ڈاکٹر منان بلوچ ءُ انوگیں کارگشاد دل مراد بلوچ ءِ نیمگ ءَ سورگھر ءِ کوھاں دیم دیگ بیتگ۔ اود ءَ آئی گوں شپانک ءُ اود ءِ جاہ مننداں یک جوانیں نزیکی یے ودی کرتگ ءُ راجی گھگیری ءُ آجوئی ءِ کلوہ سر کرتگ۔ چہ آئی جھدانی برورد ءَ اود ءَ راجی زرمبشت مھکم بیتگ۔
بی این ایم ءَ وتی درشان ءَ گوشتگ کہ کازی ھاشم بلوچ ءِ دیمونی، سروکی ءُ کار پہ مدامی گیر آرگ بنت ءُ آئی کرد دیمتر ءَ پہ جھد ءَ تچکیں راھے زانگ بیت۔
