چہ تربت ءَ پاکستانی پوج ءِ دست ءَ بیگواہ کنگ بوتگیں جیھند لیاکت ءِ گھار سمرین بلوچ ءَ وتی درشانے ءَ گوشتگ کہ منی برات جیھند بلوچ ءَ 25 مئی 2025 ءَ تُربت ءَ نیم شپ ءَ مئے کھول ءِ دیم ءَ آوار جنگ بوتگ۔ ھما اِنت کہ من ءُ منی کھول پہ آئی آجوئی ءَ یکشلہ توار چست کنگ ءَ ایں۔
آئی گوشتگ کہ زی مارا ھال دیگ بوتگ کہ آ سی ٹی ڈی ءِ دست ءَ دیگ بوتگ ءُ آئی سر ءَ دروگیں کیس جنگ ءَ اَنت کہ آ 21 ستمبر 2025 ءَ گوں تراکناکیں شورھاں دزگیر کرتگ ءُ آئی بگیری ءَ یک دروگیں آیپ آئی آر ے نبشتگ ءُ پہ دہ روچ ءِ ریمانڈ ءَ دیم دیگ بوتگ۔
آئی گوشتگ کہ من اے بھتاماں رد کناں ءُ راستی ھمیش اِنت کہ ما گوں وتی چمّاں دیستگیں گواہ ایں ۔آئی بیگواھی ءِ دومی روچ ءَ ما ایپ آئی آر نبیسگ ءِ جھد کرتگ بلے پولیس ءَ مئے ایپ آئی آر نبشتہ نہ کرتگ ءُ گوشتگ کہ مارا چہ برزا گوشگ بوتگ۔ ھمے روچ ءَ ما پریس کانپرنس کرتگ ءُ آئی آجوئی ءِ دزبندی کرتگ۔ ءُ ائید ءِ روچ ءَ ھم پہ آئی آجوئی ءَ زھرشانی کرتگ۔ گوستگیں 24 روچ اِنت کہ من اسلام آباد ءَ نشتگ ءُ زھرشانی کنگ ءَ آں ۔ آئی کیس کمیشن ءَ ھم یاداشت کرتگ۔
آئی گوشتگ کہ اے دروگیں ٹاپار ھمے پدّر کن اَنت کہ منی برات بے میار انت ءُ اے ایپ آئی آر تھنا آئی زوربیگواھی ءِ چیر دیگ ءُ دروگیں بھتامانی سر ءَ آئی تاوان دیگ ءِ جھدے۔
سمرین بلوچ ءَ گوں انسانی ھکانی کارکن ءُ رسانکدر ءَ نندوکیں مردماں لوٹ کرتگ ءُ گوشتگ کہ آ اے نا ھکی ءِ بگیری ءَ پاد بیا اَنت ءُ اے دروگیں ایپ آئی آر ءِبگیری ءَ توار چست بہ کن اَنت۔
