اسلام آباد پریس کلب ءِ دیم ءَ برجاھیں زھرشانی نندانک ءَ زور بیگواھیں بلوچ نودربر سروک شبیرءِ گھار سیما ءَ تران کرتگ ءُ گوشتگ کہ من گوستگیں ھشت سال اِنت ھمے دگانی سر ءَ گوں ھمے اکس ءَ پہ وتی برات ءِ آجوئی ءَ جھد کنگ ءَ آں، منی گون ءَ ھما مات ءُ گھار ھمراہ اَنت من آیاں دلبڈی دیگ ءَ آں کہ ما ھمے اکسانی آسر ءَ وتی زند ءَ گوازینگ ءَ این ءُ انگت ءَ گوازین ایں دانکہ اے اکسانی جاہ ءَ مئے مردم واتر نہ بوتگ اَنت ما داں ھما وھد ءَ اے جنگ ءَ مڑ ایں۔
آئی ءَ گوشتگ کہ مارا اد ءَ دو ماہ سرجم بوتگ بلے اے ریاست ءَ بوڈے گوشاں نہ وارت، ما بس وتی مردماں لوٹگ ءَ ایں کہ آ مئے گون ءَ وشھالیں زندے گوازینگ ءَ بوتگ اَنت ھمے ریاستی ادارھاں مئے چمانی دیم ءَ گراں کرتگ ءُ برتگ اَنت پد ءَ ھمے گپ گوش بیت شما ناشرکار اِنت۔ ناشرکار ھمے ادارھانی کارمند اَنت کہ مئے مردماں شپانی نیمان آوار جن اَنت ءُ بر اَنت پد ءَ مئے مردماں ناشرکار گوش اَنت۔ اے وڑین سرکاراں ملامت بوگ لوٹ ایت وتی مردماں بیگواہ کنت ءُ پد ءَ ناشرکار لیک ایت۔
سیما ءَ گوشتگ کہ ما توار چست کن این ءُ ناشرکار گوشگ بہ این ءُ توار چست نہ کن این ءُ وتی گساں نندیں ناشرکار گوشگ بہ ایں گڑا ما کج ءَ بروین ءُ وتی مردمانی لوٹ ءَ بہ کن ایں کہ مئے مردم تئی ادارھاں بیگواہ کرتگ اَنت۔ مئے مردم یل کنگ بہ بنت ما کدی دگانی سر ءَ زھرشانی نہ کن ایں۔
آئی ءَ گوشتگ کہ تو مئے مردماں چست بہ کن ءُ بہ جن ما انگت ءَ ھچ مہ گوش ایں اے وڑ بوت نہ کنت۔ دانکہ ما زندگیں پہ وتی مردمانی آجوئی ءَ لوٹ ءَ کن این ءُ دگانی سر ءَ زھرشانی کن ایں۔ مئے زھرشانی ءَ دو ماہ سرجم اِنت بلے سرکار بے تور اِنتءُ ندارگ کنگ ءَ اِنت ھمے گوش ایت کہ اے ھمے وڑ ءَ جنجال بنت ءُ دمبر اَنت، اے وڑ بوت نہ کنت ما وتی آزیزاں بے ھال کن این ءُ بے تواری ءَ وتی گساں بہ نندیں۔ اگاں اے زرمبشت چہ اد ءَ ھلاس بہ بیت ما دومی رند ءَ پد ءَ درکپ ایں۔
