اسلام آباد ءَ بلوچستانءِ جاہ منندیں ریاستی زوراکیانی آماچیں کھولانی زھرشانی نندانکءَ مرچی شست ءُ ھشت روچ سرجم بیتگ کہ انگت ءَ برجاہ اِنت۔
اے بابت ءَ آیانی گوشگ اِنت ما وھدے اسلام آباد ءَ پہ وتی بندیگیں رھشون ءُ زور بیگواھیں مردمانی آجوئی ءَ زھرشانی ءَ اتکگ ایں گڑا بندات ءَ پولیس ءَ مئے تنگ کنگ ءِ جھد کرتگ ءُ مئے راھانی سرءَ ٹٹ جتگ کہ ما ترس آماچ بہ بہ ایں ءُ وتی زھرشانی ءَ ھلاس بہ کن ایں۔
آیانی گوشگ اِنت کہ ما درسیں زوراکی اوپار کرتگ اَنت ءُپہ وتی لوٹاں زھرشانی برجاہ داشتگ کہ نوں ھمے گندگ بیت آیاں وت دمبرتگ ءُ پولیس ھم گندگ نہ بنت۔ مئے لوٹاں انگت مان آرگ ءَ نہ اَنت مئے بے اوست کنگ ءِ جھد ءَ کنگ ءَ اَنت۔
آیاں گوشتگ کہ ما وھدے چہ اد ءَ پاد ھم بیائیں بلے وتی جھد ءَ برجاہ دار ایں۔ دانکہ مئے بندیگیں رھشون یل کنگ ءُ درسیں زوربیگواھیں مردم آجو کنگ بنت ما ھچ پیم ءَ دم نہ بر ایں ءُ چہ وتی جھد ءَ دزکش نہ بہ ایں۔
آیانی گوشگ اِنت کہ مئے جھد زانت ءُ سسا ءَ چکاریں جھدے ما داں گڈی بیگواھیں مردم ءِ آجوئی ءَ وتی جھد ءَ برجاہ دار ایں۔
