کیچ: چہ تربت پریس کلب ءَ زور بیگواھیں رپیک اومان ءِ جنک سالھا رپیک گوں کھولءِ آدگہ مردمانی ھمراھی ءَ پریس کانپریس کرتگ ءُ گوشتگ کہ منی پت رپیک اومان بل نگور ھائی اسکول ءِ ھیڈ ماسٹر اِنت21 ستمبر 2014 ءَ چہ کیچ گرائمر وانگجاہ ءِ کِر ءَ آوار جنگ بیتگ داں مرچی بیگواہ اِنت۔ منی پت ٹیچرے ءَ ھوار یک گشندھے ھم بیتگ۔ آئی سرکار ءِ بگیری ءَ زھرشانی یا دگہ ھچ کار نہ کرتگ۔
آئی ءَ گوشتگ کہ مرچی مئے پریس کانپرنس ءِ مول ھمیش اِنت کہ ما گوں ریاست ءِ درسیں بھرگاں دزبندی کن ایں کہ منی پت ءَ آمیدگس ءَ پیش بہ کن اِت۔ آئی سر ءَ چونیں کیسے ھست گڑا آمیدگس ءَ بہ گوش کہ رپیک اومان اے ردی کرتگ۔ ھما سزا ءَ کہ آئین ءُ کانود دنت ما آئی ءَ من ایں۔
سالھا رپیک ءَ گوشتگ کہ اگاں کسے میارے کنت گڑا آئی سزا ءَ یک وھدے بیت یازدہ سال مزنیں وھدے کہ ما نزان ایں منی پت چون ءُ کج ءَ اِنت، ما درس آئی زوریں بیگواھی ءِ جنجالانی تہ ءَ زند گوازینگ ءَ ایں۔
آئی ءَ گوشتگ کہ منی گوں سرکار ءَ دزبندی اِنت منی پت ءَ آمیدگس ءَ بیار ءُ پیش بہ کن آئی چونیں میارے کرتگ آئی سزا بدنت۔ اگاں آ زندگ اِنت مارا آئی بابت ءَ ھال بدنت۔
سالھا رپیک ءَ گوں رسانکدر ءَ بندوکیں مردماں لوٹ کرتگ کہ ما مرچی ٹویٹر ءَ کمپینے برجم دارگ ءَ ایں، بیگاہ ءِ شش ءَ بندات بیت اے کمپین ءَ بھر بزور اِت ءُ مئے درداں شریدار بہ بہ اِت۔
