کیچ ءِ بنجاھی شھر تربت ءَ ٹیچرانی پگار ءِ بند بوگ ءِ بگیری ءَ زھرشانی روانکے کشگ بوتگ۔ زھرشانی روانک چہ مزن وانگجاہ ءَ درکپتگ ءُ تربت پریس کلب ءِ دیم ءَ مچ بوتگ اَنت۔
زھرشانی ءَ سیاسی، چاگردی کارکن، نودربر ءُ جنیناں ھوار مردماں بازیں کچے ءَ بھر زرتگ۔ زھرشانی کنوکیں مردماں بینر ءُ پلے کارڈ دستاں بوتگ کہ پلے کارڈانی سر ءَ جتائیں اوگام نبشتہ بوتگ۔
آیانی گوشگ اِنت کہ کیچ دمگ ءَ 148 وانگجاھانی ٹیچرانی پگار بند اِنت۔ ھشت ماہ بیت کہ آیانی پگار آھگ ءَ نہ اَنت ءُ ٹیچر جنجالانی دیمپان اَنت۔
آیاں گوں وتگڑیں سرکار ءَ لوٹ کرتگ ءُ گوشتگ کہ درسیں ٹیچرانی پگار زوتاں چہ زوت دیگ بہ بنت۔
