اسلام آباد ءَ پہ بلوچ یکجھتی کمیٹی ءِ سروک ءُ بیگواھیں مردمانی آجوئی ءَ برجاھیں زھرشانی ءَ شست ءُ پنچ روچ سرجم بیتگ کہ انگت ءَ برجاہ اِنت۔
مرچی سانمندیں کھولانی زھرشانی نندانک ءَ کلانھیں سیاست دان جاوید ھاشمی ءَ ھوار آدگہ مردم پہ ھمدردی درشان کنگ ءَ آتکگ اَنت۔
چہ زھرشانی نندانک ءَ نشتگیں مردمانی گوشگ اِنت کہ ما گوستگیں شست ءُ پنچ روچ اِنت کہ اد ءَ زھرشانی ءَ نشتگ ایں، بلے اد ءَسرکار ءَ ابید آدگہ شھری ھم اچما گیشینگ بیتگ اَنت۔ ما دو ماہ اِنت اد ءَ اے جاہ ءَ نشتگ ایں ما اے جاہ ءَ را کسانیں بلوچستان ءِ نام داتگ۔ چی ءَ کہ اد ءَ نشتگیں پیر زال گوں کجام رنجاں زند گوازینگ ءَ اَنت۔
آیاں گوشتگ کہ ھما مردم بلوچستان ءَ اتک نہ کن اَنت گڑا ھمد ءَ بیا اَنت ءُ اے مردماں بہ چار اَنت اے تھنا کمیں مردم نہ اَنت بلکیں دردانی کسہ اَنت۔ چہ اے نشتگیں مردمانی درداں ھمے مارگ بیت کہ بلوچستان ءَ گوستگیں ھشت سالاں گوں بلوچاں چے بوگ ءَ اِنت۔
