اسلام آباد ءَ پہ بلوچ یکجھتی کمیٹی ءِ سروک ءُ زور بیگواھیں مردمانی آجوئی ءَ برجاھیں زھرشانی نندانک ءَ شست ءُ یک روچ سرجم بیتگ کہ انگت برجاہ اِنت۔
اے بابت ءَ زھرشانی کنوکیں مردمانی گوشگ اِنت کہ مارا اد ءَ شست روچ ءَ گیش اِنت نشتگ ایں چہ سرکار ءِ نیمگ ءَ پہ مئے لوٹانی منّگ ءَ ھچ وڑیں گامگیج زورگ نہ بیتگ۔ انچو روچانی میان ءَ مارا نہ ٹینٹ جنگ ءِ موکل دیگ بیتگ ءُ نہ مئے گپ گوش دارگ بنت۔
آیانی گوشگ اِنت کہ انچو روچ ءِ زھرشانی ءَ ما ہر پیمیں جنجال دیستگ اَنت۔ گرم، ھور، گژن ءُ زوراکی درس اوپار کرتگ اَنت۔ ما ھمک روچ چہ انتزامیہ ءِ نیمگ ءَ بیھار دیگ ھم بیتگ ایں۔
آیانی گوشگ اِنت کہ اے نندانک نہ تھنا پہ انساپ ءِ لوٹ ءَ برجاہ اَنت، بلکیں اے ریاستی زوراکیانی بگیری ءَ گھگیری کنگ ءِ جار اِنت۔
آیانی گوشگ اِنت یک سرڈگارے ءِ پیرزالیں ماس پہ وتی بیگواھیں زھگانی آجوئی ءَ دگانی سر ءَ نشتگ اَنت۔ گڑا اے راج ءَ چونیں ھم زوراک وتی ایردست کرت نہ کنت۔
آیانی گوشگ اِنت کہ مئے لوٹ ھمیش اَنت ڈاکٹر ماہ رنگ بلوچ گوں بی وائی سی ءِ درسیں بندیں سروک یل کنگ بہ بنت ءُ زور بیگواھیں مردم آجو بہ کنگ بنت۔ بلوچستان ءَ زوریں بیگواھی بند کنگ بہ بیت۔
