کراچی ءَ پہ زوربیگواھیں مردمانی آجوئی ءَ کراچی پریس کلب ءِ دیم ءَ برجاھیں زھرشانی نندانک ءَ چل روچ سرجم بیتگ کہ انگت ءَ برجاہ اِنت۔
پہ زور بیگواھیں مردمانی کھولانی گون ءَ ھمدردی درشان کنگ ءَ جتائیں بھرگاں سیادی داروکیں مردم نندانک ءَ پیداک اَنت۔ چل روچ سرجم بوگ ءَ ابید ھم چہ سرکار ءِ نیمگ ءَ گامگیج زورگ نہ بیتگ۔
زھرشانی ءَ نشتگیں مردماں گوشتگ کہ زوریں بیگواھی تھنا یک مردمے ءِ جیڑہ نہ اِنت سرجمیں کھول ءَ گوں درد ءُ رنجاں جنجال کنت۔ زوریں بیگواھی ڈیھ ءِ آئین ءُ کانود ءَ ھوار انسانی ھکانی بگیری اِنت۔ پمشکا ریاست ءَ وتی ڈیھ ءِ راھبندانی ھیال دارگی اِنت۔
آیانی گوشگ اِنت کہ اگاں مئے زھگانی سر ءَ چونیں ھم بھتامے ھست گڑا آمیدگس ءَ پیش کنگ بہ بنت بے میار اَنت گڑا زوت یل کنگ ءُ کھول چہ اے گرانیں رنجاں کشگ بہ بنت۔
آیانی گوشگ اِنت کہ مئے لوٹ ڈیھ ءِ کانود ءِ رد ءَ اَنت اگاں اد ءَ سرکار مئے توار ءَ گوش نہ دار ایت ءُ پہ مئے لوٹاں گامگیج نہ زور ایت گڑا ما دگہ کج ءَ نہ رو ایں۔
