بلوچ وومن پورم ءِ سروک ڈاکٹر شلی بلوچ ءَ وتی شنگ کرتگیں درشانے ءَ گوشتگ کہ ماں رسانکدر ءَ ماما کدیر ءِ بیرانی ءِ دروگیں ھالے شنگ اِنت من گوں بلوچ مھلوک ءَ دزبندی کن آں کہ اے وڑیں ھال ءِ شِنگ کنگ ءَ پیسر ھال ءَ پکا بہ کن اَنت ، مرچی من وت ماما کدیر ءِ کِرّا بوتگ آں آ جوڑ ءُ سلامت اِنت۔ ماما تبیت چہ پیسر ءَ انوں جوانتر اِنت۔
آئی ءَ گوشتگ کہ ما درست سرپد ایں کہ چہ مئی ءَ ماما ءِ تبیت نا ساز اِنت ءُ نادارہ جاہ ءَ ایڈمیٹ اِنت چہ ردیں ھال ءِ شنگ کنگ ءِ جاہ ءَ پہ ماما ءِ جان سلامتی ءَ دوا بہ کن اِت۔
ڈاکٹر شلی بلوچ ءَ گوشتگ کہ ماما کدیر، بلوچ جھد ءِ تہ ءَ یک درپشوکیں نامے کہ آئی ھر وڑیں سکی ءُ سوری دیستگ بلے دم برگ نہ زانتگ ،پاد ءِ تراول بیتگ اَنت بلے انگت جنزان بیتگ، بیت کنت پیر مرد بالادی دروشم ءَ نزور اِنت بلے آئی پگر چوں باتیل ءَ مھکم اِنت۔بازیں جھد کارانی سیاسی جھد ءِ بندات چہ ماما ءِ بُنجل ءَ بندات بیتگ ءُ آھاناں دیم ءَ جنزگ ءِ سکین رستگ۔ چہ شانزدہ سال ءَ برجاھیں کیمپ ایوک ءَ یک کیمپے نہ اِنت بلکیں پہ ھمک بیگواھیں مردمانی کھولاں یک امیتے۔
آئی ءَ گوشتگ کہ اے گپ ھم مردمان ءَ زانگ لوٹ ایت ماما کدیر یک گلے ءِ مرکزی سروکے ھدا مہ کنت چوشیں گپے بہ بیت گل ءُ آئی سنگت وت گپ ءَ پکا کن اَنت۔ دانکہ چہ آئی ادارہ ءَ چوشیں گپے نہ بوتگ مردم اے وڑیں دروگیں گپانی سر ءَ بروسہ مکن اَنت۔
