بلوچ اسٹوڈنٹس ایکشن کمیٹی ءِ جارکش ءَ وتی شنگ کرتگیں درشانے ءَ گوشتگ کہ بلوچ ڈیھ ءَ ھزاراں شائر، ادیب، اُستاد ءُ زانتکار ودی بیتگ کہ آھانی راجی زمہ واریاں چہ بلوچ راج ءَ بے مٹیں راجی نپ رستگ۔ کسے ءَ وتی جورجوابیں توار ءَ گوں بلوچ راج باسما کتگ، کسے ءَ گوں نبشھاں راج آژنا کتگ ءُ کسے ءَ وتی ند ءَ چہ دراتکگیں لبزاں گوں راجی جیڑھانی نہ تھنا درْنگازی کتگ بلکیں مہلوک ءِ تہ ءَ راجی سِنچ آرگ ءَ کردی دروشم ءَ جھد کتگ۔
آئی ءَ گوشتگ کہ مئے گور ءَ چُشیں راجی بامردانی لڑ مزن اِنت بلے مبارک کازی چہ ھما کرداراں یکے کہ آئی ءَ چہ دلیری ءُ ھمت ءَ بلوچ گُلزمین ءِ ھمک انسان داں درچک ءُ دار آژنا اِنت، آئی ءَ وتی راجی زمہ واری شئیرانی انچیں دروشمے ءَ پیلو کُتگ کہ ھمک دور ءُ باریگ ءَ پہ بلوچ راج ءَ نیکیں پنت ءُ سلاہ اَنت۔ مبارک کازی ءَ وتی راجی زمہ واری انچیں دابے ءَ پیلو کُتگ اَنت کہ آئی ءِ کرِد نہ لبزاں گوں گِشینگ بیت ءُ ناکہ چہ توسیپ ءُ ستاھاں انساپ بیت کنت۔
آئی ءَ گوشتگ کہ کازی ھما راجی کِردار اَت کہ آئی ءَ راج ءِ تہ ءَ زِندگی ءَ ھما نام ءُ جاہ کٹ اِت کہ دگہ ھچ شائر ءَ اے کچ ءَ نہ رستگ۔ آئی ءِ ند ءَ درتکگیں لبزاں بلوچ ءِ زمین، راج، بزگی، درتہ پُچی، دشت ءُ جنگل، کوہ ءُ گیابان، چاگرد ءُ آشوب ءَ ھوار گُلزمین ءَ بندوکیں ھمک شئے نازینت ءُ داں رپت ءُ شُت آ بلوچ ءُ بلوچستان ءَ نازینان اَت۔
جارکش ءَ گوشتگ کہ آئی ءَ 16 ستمبر 2023 ءَ جسدی دروشم ءَ بلوچ راج اِشت ءُ شُت بلے آئی ءَ پہ وت انچیں نمیرانی یے نام ءَ کُت کہ داں گُلزمین ءَ یک ھم ساھدارے ھست آئی ءَ یات کنت۔
آئی ءَ گوشتگ کہ بلوچ اسٹوڈنٹس ایکشن کمیٹی مبارک کازی ءِ سالروچ ءِ درگت ءَ جتائیں ھنکیناں مراگش دارگ بیتگ کہ آھانی تہ ءَ زانشتی مراگش، ھیلکاری دیواناں ھوار ایدگہ مراگش برجم دار اَنت۔
