بلوچستان لبریشن پرنٹ (بی ایل ایپ) ءِ جارکش میجر گھرام بلوچ ءَ گوشتگ کہ بی ایل ایپ ءِ سرمچاراں 5 ستمبر ءِ شپ ءِ ادار ھپت ءَ تُربَت ءِ ھند سری کھن ءَ گوں مھکمیں چیر جنگی شوربندیاں پولیس کارمند انگر کرتگ ءُ آ دزگیر کرتگ اَنت ءُ سلاہ، پرپٹ ءُ آدگہ سامان پل اِتگ اَنت۔ پولیس کارمند بلوچ بوگ ءِ بنیاد ءَ کڈن کرتگ ءُ یل داتگ اَنت۔
آئی گوشتگ کہ اے کاروائی بلوچستان لبریشن پرنٹ ءِ سرمچارانی چیر جنگی ءِ ٹیکٹیکل ءِ شری ءُ آپریشنل ءِ زانتکاری ءِ پدّریں منانک اِنت۔
آئی گوشتگ کہ پاکستانی پوج ءُ آئی جھلی ادارہ بلوچ گھگیری ءِ دیم ءَ سرجم ءَ نادرّس اَنت۔پمشکا پوج وتی نزوری ءُ بے سوبی ءِ پہ چیر دیگ ءَ پولیس کارمنداں دیم آرگ ءَ اِنت دانکہ بلوچ سرمچارانی تر ءُ گرد ءِ سرپدیاں یکجاہ کرت بہ کنت۔ بلے انوں لھتیں ماہ بیت کہ بی ایل ایپ ءِ سرمچارانی جنگی رپک ءَ ریاست ءِ ھمک پالیسی بے سوب کرتگ۔
میجر گھرام ءَ اے کاروائی ءِ زمہ واری من اِتگ ءُ گوشتگ کہ ما پولیس کارمنداں کڈن کن ایں کہ آ سرمچارانی رندگیری کنگ ءُ دیم پہ دیمی کنگ ءَ پھریز بہ کن اَنت چی ءَ کہ یک زمہ واریں بلوچ گلے ءِ بنیاد ءَ ما نہ لوٹ ایں مئے سلاہ بلوچے ءِ تاوان دیگ ءَ چست بہ بیت۔
