اسلام آباد ءَ پہ بلوچ یکجھتی کمیٹی ءِسروک ءُ زور بیگواھیں مردمانی آجوئی ءَ برجاھیں زھرشانی نندانک ءَ پنجاہ ءُ دو سرجم بیتگ کہ انگت ءَ برجاہ اِنت۔ اے زھرشانی نندانک ءَ چہ بلوچستان ءِ جتا جتائیں ھند ءُ دمگاں بیگواہ کنگ بیتگیں مردمانی کھول ساڑی اَنت۔
پہ زھرشانی ءَ نشتگیں مردمانی ھمدردی ءَ جتائیں بھرگاں سیادی داروکیں مردم پیداک اَنت۔ چہ پنجاہ روچ ءِ گوزگ ءَ ابید چہ سرکار ءِ نیمگ ءَ انگت ءَ پہ آیانی لوٹانی گوش دارگ ءَ ھچ وڑیں گامگیج زورگ نہ بیتگ۔
اے بابت ءَ زھرشانی ءَ نشتگیں مردمانی گوشگ اِنت زی ما زھرشانی روانکےکش اتگ بلے پہ مئے ترسینگ ءَ بازیں کچے ءَ پولیس کارمند آرگ بیتگ اَنت۔ دانکہ مئے زھرشانی ءِ آسری ءَ پولیس کارمند مئے کرءُ کشاں اوشتوک بیتگ اَنت۔
آیانی گوشگ اِنت کہ ما چہ درسیں زوراکیاں ابید وتی زھرشانی برجاہ داشتگ۔ مئے زھرشانی داں ھما وھد ءَ برجاہ بیت دانکہ مئے رھشون یل کنگ نہ بیتگ اَنت ءُ مئے درسیں لوٹ منگ نہ بیتگ اَنت۔
