اسلام آباد:پہ بی وائی سی ءِ سروک ءُ زوربیگواھیں مردمانی آجوئی ءَ کھولانی برجاھیں زھرشانی ءَ 51 روچ سرجم بیتگ ، کھولاں مرچی روانکے کشتگ ، روانک ءَ چہ جتائیں بھرگاں سیادی داروکیں مردماں بھر زرتگ۔
اے بابت ءَ بی وائی سی ءِ سروک ءُ زوربیگواھیں ڈاکٹر دین مھمد ءِ جنک سمی دین بلوچ ءَ ماں رسانکدر ءَ وتی پوسٹے ءَ گوشتگ کہ مرچی اسلام آباد پریس کلب ءِ دیم ءَ برجاھیں زھرشانی ءَ 51 روچ سرجم بیتگ ، پنجاہ روچ اِنت کہ اے مات ، گھار ، کماش ءُ زھگ پہ وتی آزیزانی آجوئی ءُ دزگیر کنگ بیتگیں سنگتانی یل کنگ ءَ دگانی سر ءَ نشتگ اَنت ، ھور بہ بیت یا گرمی اے زھرشانی سبر ءُ جھد ءِ یک چیدگے جوڑ بیتگ۔
آئی ءَ گوشتگ کہ مرچی زھرشانی جاہ ءَ یک روانکے کشّگ بیتگ کہ پولیس ءُ انتزامیہ ءَ پہ آئی ءِ دارگ ءَ ھر وڑیں جھد کرتگ ، بلے کھولاں آیانی پندل پروشتگ اَنت ءُ روانک گوں سوبمندی ءَ آسر کرتگ ، اے روانک ءَ چہ جتائیں بھرگاں سیادی داروکیں مردماں بھر زرتگ ، آیاں پما توار چست کرتگ ءُ گوں زوراکی آماچیں کھولاں وتی یکمشتی درشان کرتگ۔
سمی دین بلوچ ءَ گوشتگ کہ مئے چہ اے زھرشانی ءَ دو بُنکی لوٹ اَنت ، بی وائی سی ءِ دزگیر کنگ بیتگیں سنگت یل کنگ ءُ زوربیگواھیں مردم آجو کنگ بہ بنت ، بلے اے تچکین ءُ بُنکی لوٹانی بابت ءَ چہ ریاست ءِ نیمگ ءَ ناں کہ گپ ءُ تران کنگ بوگ ءَ اِنت ءُ ناں کہ چونیں رھوتے کنگ بیتگ ۔
