بلوچ نیشنل موومنٹ ( بی این ایم ) ءِ جارکش ءَ ماں رسانکدر ءَ وتی شنگ کرتگیں درشانے ءَ گوشتگ کہ 30 اگست ءَ زوربیگواھی ءِ میان اُستمانی روچ ءِ درگت ءَ بی این ایم ءَ نیدرلینڈ ءِ شھر اوترکت ءَ زھرشانی کرتگ ، اے زھرشانی ءَ پشتون تھپز موومنٹ ، جئے سندھ فریڈم موومنٹ ءُ انسانی ھکانی کارکناں ھم بھر زرتگ ءُ ھمدردی درشان کرتگ ، زھرشانی کنوکاں بلوچستان ءِ زوربیگواھیں مردمانی اکس ، بینرز دست ءَ بیتگ۔
آئی ءَ گوشتگ کہ زھرشانی ءَ بی این ایم ءِ نیدرلینڈ ھنکین ءِ سدر مھیم ابداُلرھیم ، ڈاکٹر لتیپ بلوچ ، اکبال بلوچ ، منیر بلوچ ، کیا کریم بلوچ ، جئے سند فریڈم موومنٹ ءِ کارکن ابدالستار ءُ انسانی ھکانی کارکن زر ھان ءَ تران کرتگ ءُ گوشتگ کہ زوربیگواھی پاکستانی ریاست ءِ ادارھانی دست ءَ یک مھکمیں شونداتے ءِ پیم ءَ اِنت کہ بلوچ ، پشتون ، سندی ءُ آدگہ ایردستیں راجانی ھزارانی کچ ءَ مردم نشانگ جوڑ بیتگ اَنت۔
آئی ءَ گوشتگ کہ ھچ راج چہ پاکستان ءِ پوج ءِ دست ءَ زوراکیاں پھریز نہ اِنت ، سیاسی کارکن ، نودربر ، وکیل ، استاد ، اھوالکار ، زانتکار ءُ انسانی ھکانی سروک اَبید ءِ کانودی کاروائی ءَ آوار جنگ ءَ پد زوربیگواہ کنگ بنت ءُ آیانی کھولاں داں بازیں سالاں ھچ وڑیں ھال دیگ نہ بیت۔
زھرشانی کنوکاں گوشتگ کہ زوربیگواھی تھنا یک کانودی یا سیاسی جیڑھے نہ اِنت بلکیں پہ انسانیت ءَ یک ٹوھیں تباھی یے ، اے زوراکیانی آسر ءَ یک مردمے ناں بلکیں آئی ءِ کھول ، چاگرد ءُ راج سکا سسائی ءُ چاگردی آزارانی آماچ بیت۔
آیاں گوشتگ کہ اگاں مردمے آجوئی ، انساپ یا راجی ھکانی بابت ءَ ھبر بہ کنت آ گوں زوربیگواھی ءَ سزا دیگ بیت ، بلوچستان ءَ چہ گوستگیں دو دھکاں پاکستانی پوج ءِ برجاھیں کاروائیاں ھزارانی کچ ءَ مردم زوربیگواہ کنگ بیتگ ، بیگواھیں مردمانی تہ ءَ بازیں کچے ءَ نودربر ، انسانی ھکانی کارکن ، استاد ، ڈاکٹر ، وکیل ، زانتکار ءُ ورنا ھوار اَنت ، چہ آیاں باز مردم درکانودی کشگ ءُ مچی مانشانی تہ ءَ کَلّ کنگ بیتگ ، ھمے وڑ ءَ دگہ باز مردم ءِ بابت ءَ انگت زانگ نہ بیت کہ آ زندگ اَنت یا کہ مرتگ اَنت۔
زھرشانی کنوکاں تران کرتگ ءُ گوشتگ کہ زوربیگواھی تھنا یک مردمے ءِ بیگواھی نہ اِنت ، بلکیں یک سرجمیں کھولے ءِ ھمک روچی آزار دیگ ءُ تباھی ءِ نشان اِنت ۔ یک ماتے کہ پہ وتی زھگ ءِ شوھاز ءَ داں سالانی سال در پہ در اِنت ، یک گھارے کہ پہ انساپ ءَ ھمک دروازگ ءَ ٹُکگ ءَ اِنت ، یک پِتے کہ چہ بے وسی ءَ بے توار اِنت ، اے ٹپاں تھنا ھما مردم مار اِت کنت کہ آ وت ھمے ٹپانی آماچ بیتگ۔
