بلوچ آجوئی لوٹوکیں سروک رھیم بلوچ ایڈوکیٹ ءَ ماں چاگردی رسانکدرایکس ءَ وتی شنگ کرتگیں درشانے ءَ گوشتگ کہ زی شال ءَ بلوچ راجی رھشون سردار اتااللہ ھان مینگل ءِ سالروچ ءِ مچی ءَ بمب ارش ءَ گوں ترندیں دانکاں ایر جن آں۔ اے ناشریں کار ریاستی ادارھانی کردار اِنت۔ زورگریں ریاست بلوچستان ءَ بلوچ ءُ بلوچستان ءِ نام ءَ چونیں ھم سیاسی ءُ انسانی ھکانی سرگرمیں تواراں اوپار کرت نہ کنت، بزاں کہ آ پارٹی یا گل پاکستانی نوک آبادکاریں ریاستی راھبند ءِتہ ءَ بلوچ ءِ نام ءَ بہ گیت بلے زورگریں ریاست آئی ءَ اوپار کرت نہ کنت۔ ایشی نوکیں مسال بی این پی ءِ مچی ءِ سر ءَ بمب تراک اِنت۔
آئی ءَ گوشتگ کہ اے وڑیں رستری کاروائیانی مول ناشرکاری ءِ تالان کنگ اِنت دانکہ سیاسی ءُ انسانی ھکانی تواراں بے توار بہ کنت ءُ ریاستی ادارھانی دست ءَ برجاھیں بلوچ چکچینی ءَ چیر بہ دنت۔
بلوچ سروک ءَ گوشتگ کہ اے بمب تراک ءَ درزنانی کچ ءَ مردمانی شھیدی ءَ بژنیگ ایںءُ منی دوا گوں شھید بیتگیں کارکنانی کھولانی گون ءَ ھمراہ اِنت۔ پاکیں ھاوند شھیدانی کھولاں سبر ءُ اوپار بہ دنت ءُ ٹپی بیتگیناں دراہ بہ کنت۔
