اسلام آباد ءَ پہ بلوچ یکجھتی کمیٹی ءِ سروک ءُ زور بیگواھیں مردمانی آجوئی ءَ برجاھیں زھرشانی نندانک ءَ پنجاہ روچ سرجم بیتگ۔ چہ پنجاہ روچ ءِ سرجم بوگ ءَ ابید انگت ءَ چہ سرکار ءِ نیمگ ءَ پہ آیانی لوٹانی گوشگ دارگ ءَ ھچ وڑیں گامگیج زورگ نہ بیتگ۔
چہ سانمندیں کھولانی نیمگ ءَ باندا اسلام آباد پریس کلب ءِ دیم ءَ یک زھرشانی یے کنگ بوگ ءَ اِنت اے بابت ءَ مرچی بلوچ یکجھتی کمیٹی ءِ سروک سمی دین، نادیہ بلوچ ءُ ایڈوکیٹ ایمان مزاری ءِ نیمگ ءَ جتا جتائیں جاھاں پنتاک بھر ءُ بانگ کنگ بیتگ۔
اے بابت ءَ بلوچ یکجھتی کمیٹی ءِ سروک سمی دین ءِ گوشگ اِنت کہ ما گوستگیں پنجاہ روچ اِنت اد ءَ نشتگیں موسم ءِ ھرابی ءُ انتزامیہ ءِ زوراکی درس دیستگ اَنت۔ آیاں پہ مئے زھرشانی ءِ ھلاس کنگ ءَ جتائیں ھیلہ کارمرز کرتگ بلے ما گوں پر ایمنی ءَ وتی زھرشانی برجاہ داشتگ۔
آئی ءِ گوشگ اِنت کہ مئے دو آئین ءُ کانودی لوٹ اَنت یکے ھمیش اِنت کہ بلوچ یکجھتی کمیٹی ءِ سروک دزگیر کنگ ءُ آیانی سر ءَ دروگیں کیس جنگ بوتگ پہ آیانی یل کنگ ءَ دلجمی دیگ بہ بیت۔ بلوچستان ءَ انسانی ھکانی لگتمال بوگ ءَ اَنت ءُ زوریں بیگواھی برجاہ اِنت سرکار مارا ھمے دلجمی ءَ بہ دنت کہ آ وتی پالیساں مٹ کنت ءُ زور بیگواھیں مردم آجو کنگ بہ بنت۔
سمی دین ءَ گوشتگ کہ مئے زھرشانی ءَ پیرزال ءُ کسانیں زھگ ھمے اوست ءَ نشتگ اَنت کہ مئے گپ گوش دارگ بہ بیت۔ اد ءَ پنجاہ روچ ءِ گوزگ ءَ ابید یک سرکاری جھگیرے ءَ آیانی ھال نہ گپتگ کہ شما چے ءَ اتکگ اِت۔
آئی ءَ گوشتگ کہ ما باندا چہ اسلام آباد پریس کلب ءِ دیم ءَ زھرشانی روانکے کش ایں گوں درسیں مردماں لوٹ کن ایں کہ آ بیا اَنت ءُ روانک ءَ بھر بزور اَنت۔
