اسلام آباد پریس کلب ءِ دیم ءَ برجاھیں زھرشانی نندانک ءَ سبگت اللہ شاہ جی ءَاسلام آباد پولیس ءِ زوراکیانی بارو ءَ وتی تامربندے ماں رسانکدر ءَ شنگ کرتگ ءُ گوشتگ کہ ما باند ءَ مراگشے برجم دارگ ءَ بوتگیں پولیس ءُ آدگہ ادارہ مارا دارگ ءُ دلسیاہ کنگ ءَ اِنت، مئے کرسی، تلو ءُ ساماناں آرگ ءَ نیلگ ءَ اَنت۔
آئی ءَ گوشتگ کہ ما مدام آیاں منت کنگ ءَ این ءُ اے وھد ءَ دو ادار گوستگ بلے مئے رد دیگ ءِ جھد ءَ کنگ ءَ اَنت ءُ مئے ساماناں برگ ءَ نیلگ ءَ اَنت۔ ادءَ سوزوکی ءَ مئے سامان آرتگ اَنت آیاں ھمے سوزوکی گوں ساماناں برتگ ءُ بند کرتگ۔
سبگت اللہ شاہ جی ءَ گوشتگ کہ ما دیم ءَ نزانیں مئے گون ءَ چے بہ بیت بلے انوں مئے سامان ئے داشتگ اَنت۔
اے بارو ءَ سبگت اللہ شاہ جی ءَ ماں چاگردی رسانکدر ایکس ءَ نبشتہ کرتگ کہ پولیس مارا مدام دلسیاہ کنگ ءَ اِنت ءُ من ءَ ھمے بیھار ءَ دیگ ءَ اِنت کہ وتی اسلام آباد ءِ سنگتانی ناماں بہ گوش ءُ آیانی ماسکاں دور کن۔
آئی ءَ گوشتگ کہ یک ھمبلے ءَ بیھار ئے داتگ تئی دروشم منی دیم ءَ اِنت تو پشت نہ کپ ئے۔ من گوشتگ کہ من وتی ھمک نودربر ءِ زمہ واراں۔ اگاں کجام نودربر ءَ چے بوت آئی زمہ وار پاکستانی ادارہ اَنت۔
